Pieratrusy pa piaci adrasach. Padrabiaznaści zatrymańnia žurnalista Jaŭhiena Mierkisa
Homielskaha žurnalista Jaŭhiena Mierkisa zatrymali 13 vieraśnia ŭ miežach kryminalnaj spravy. Paśla šerahu pieratrusaŭ Jaŭhien znachodzicca ŭ homielskim SIZA №3. Raskazvajem niekatoryja detali hetaj spravy.
Pačatkova źjaviłasia infarmacyja, što žurnalista vinavaciać u zaklikach da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś (č. 1 art. 361 Kryminalnaha kodeksa).
Adnak ciapier žurnalista vinavaciać pa častcy pieršaj artykuła 361-4 Kryminalnaha kodeksa (sadziejańnie ekstremisckaj dziejnaści).
Pa hetym artykule Mierkisu pahražaje pakarańnie ŭ vyhladzie abmiežavańnia voli na termin da čatyroch hadoŭ abo pazbaŭleńnia voli na termin ad dvuch da šaści hadoŭ. Pad ekstremisckaj dziejnaściu ŭ sučasnaj Biełarusi faktyčna ličycca žurnalisckaja praca. Redakcyi takich vydańniaŭ, naprykład, jak «Naša Niva», Radyjo Svaboda, Biełsat, Jeŭraradyjo, pryznanyja ŭładami ekstremisckimi farmavańniami.
Vierahodna, na Mierkisa buduć zaviedzieny kryminalnaja spravy i pa inšych artykułach. Advakat Mierkisa znachodzicca pad padpiskaj ab nierazhałošvańni.
Jak stała viadoma «Našaj Nivie», u miežach hetaj kryminalnaj spravy
siłaviki praviali nie mienš za 5 pieratrusaŭ pa roznych adrasach. Pieratrusy adbyvalisia 13 i 14 vieraśnia. U zdymnuju kvateru žurnalista siłaviki prychodzili dvojčy. Pryčym druhi raz heta adbyłosia ŭžo paśla taho, jak jahonyja rečy byli vyviezienyja z kvatery, a ŭ samim pamiaškańni znachodzilisia supracoŭniki klininhavaj kampanii.
Padčas pieratrusu ŭ kvatery, dzie žyŭ Jaŭhien, siłaviki zabrali telefon, noŭtbuk, kamiery i inšuju techniku. Listy ad Mierkisa pakul nikomu nie prychodzili.
Kamientary