«Kolkaść płatnych parkovak u stalicy budzie pavialičvacca. Hałoŭnaja meta — razhruzić centr horada», — raskazaŭ dyrektar DU «Parkoŭki stalicy» Michaił Filipaŭ u nacyjanalnym pres-centry, piša Office Life.
«Pryjazdžajuć aŭtamabilisty ŭ horad, jość žadańnie pryparkavacca kala pracoŭnaha miesca, administracyjnaha budynka, handlovaha centra — adpaviedna, uvieś horad zabity. Pry uviadzieńni płatnaj parkoŭki adrazu źjaŭlajecca 25-30% volnych miescaŭ, — tłumačyć Michaił Filipaŭ nieabchodnaść pavieličeńnia kolkaści płatnych parkovak u stalicy. — Čałaviek razumieje, što lepš raźmiaścić mašynu na pierachoplivajučaj stajancy i pierasieści na hramadski transpart. Adsiul idzie źnižeńnie nahruzki na horad, pamianšeńnie zatoraŭ, ekałahičnaja situacyja taksama palapšajecca».
Dyrektar DU «Parkoŭki stalicy» raskazaŭ, što chutka novyja płatnyja parkoŭki źjaviacca ŭ rajonie płoščy Pieramohi (heta vulicy Kamunistyčnaja, Kisialova), a taksama na vulicach Vyzvaleńnia, Špalernaj, Šornaj, praciahu vulic Rakaŭskaj, Daŭhabrodskaj, Vakzalnaj.
Ciapier u Minsku dziejničajuć 63 płatnyja parkoŭki, ź jakich dźvie — zakrytaha typu. Na ich adnačasova moža raźmiaścicca 5 162 aŭtamabili. Pamier płaty za parkoŭku zaležyć ad jaje raźmiaščeńnia. Hadzina stajanki na adkrytaj parkoŭcy kaštuje 1 rubiel, na terytoryi Trajeckaha pradmieścia — 2 rubli, na terytoryi Vierchniaha horada — pieršaja hadzina 5 rubloŭ, kožnaja nastupnaja hadzina — 2 rubli. Hetyja hrošy iduć u haradski biudžet.
U DU «Parkoŭki stalicy» zapeŭnili, što pierahladać košt płatnych parkovak u najbližejšy čas nie płanujuć. Źmianicca taryfy mohuć tolki na zakrytaj parkoŭcy na vulicy Tałbuchina, adnak hetaje pytańnie jašče prapracoŭvajecca.
Akramia taho, Michaił Filipaŭ raskazaŭ, što Minsk budzie pierajmać dośvied Maskvy ŭ płanie vykarystańnia videa— i fotafiksacyi na płatnych parkoŭkach: ciapier dla hetaha niama zakanadaŭčaj mahčymaści, ale adpaviedny dakumient užo ŭniesieny na razhlad urada. Hety ž dakumient praduhledžvaje adkaznaść dla tych, chto nie apłačvaje parkoŭku.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary