«Maskvič» chutka vierniecca na darohi Biełarusi, ale heta budzie nie maskvič, a ańchojec
Pra toje, što rasijanie źbirajucca adradzić marku «Maskvič», zahavaryli adrazu paśla taho, jak stała viadoma, što Renault sychodzić z Rasii. Vyrablać ich majuć na nacyjanalizavanym zavodzie Renault u Maskvie. A dniami stała viadoma, jakim budzie novaje aŭto.
Za hučnymi zajavami pra «adradžeńnie» lehiendarnaha savieckaha brenda staić toje, što ciapier zamiest aŭtamabilaŭ marki Renault u Maskvie prosta naładziać krupnavuzłavuju zborku kitajskich JAC JS4. Ich i buduć pradavać pad markaj «Maskvič».
U Maskvie płanujuć źbirać jak aŭtamabili z ruchavikom unutranaha zharańnia, tak i elektramabili. Zhodna z danymi ŭ bazie Rasstandarta, mašyna ź bienzinavym ruchavikom budzie vypuskacca pad nazvaj «Maskvič 3», a elektramabil budzie mieć nazvu «Maskvič 3ie».
Uličvajučy toj fakt, što biełaruski rynak novych aŭto mocna zaležyć ad rasijskaha, možna nie sumniavacca, što praź niekatory čas paśla taho, jak «Maskvičy» pastupiać u prodaž u RF, jany źjaviacca i ŭ Biełarusi. Heta ŭ svaju čarhu jašče bolš pavialičyć dolu kitajskich aŭto na našym rynku.
Ab tym, što biełarusy vymušana robiacca «bolš łajalnymi» da aŭto kitajskich brendaŭ, padčas niadaŭniaj pres-kanfierencyi havaryŭ staršynia praŭleńnia Biełaruskaj aŭtamabilnaj asacyjacyi Siarhiej Varyvoda.
Prahnazujecca pavieličeńnie doli kitajskich marak u prodažy. Ich dola ŭ kastryčniku ŭžo pieravysiła 60%. Pačynajučy z červienia, Geely źjaŭlajecca absalutnym lidaram pa prodažy lehkavych mašyn u krainie. Całkam vierahodna, što Geely ŭtrymaje svaju pazicyju. 17 listapada «BiełDžy» prezientavała siedan Emgrand7 New. Košt novaj madeli pakul nie ahučyli, ale ŭ lubym vypadku heta budzie samaje dastupnaje aŭto ŭ liniejcy, pakolki na biahučy momant u Biełarusi vypuskajuć tolki parkietniki Geely.
Tym nie mienš, ahulnyja ličby prodažu novych aŭto ŭ Biełarusi vyhladajuć apakaliptyčna. Čakajecca, što ŭ hetym hodzie dylerami budzie pradadziena kala 14 tysiač novych lehkavych aŭtamabilaŭ. Tady jak u minułym hodzie hetaja ličba pieravyšała 40 tysiač.
Kitajskaja kampanija JAC Motors mieścicca ŭ horadzie Chiefej pravincyi Ańchoj. JAC rasšyfroŭvajecca jak Chuajchejskaja ańchojskaja kampanija — pa naźvie pravincyi i hieahrafičnaha rehijona, pa naźvie raki Chuajche. Heta nie samy vialiki vytvorca aŭtamabilaŭ u Kitai, kampanija vyrablaje kala 500 tysiač mašyn za hod, pieravažna hruzavych busaŭ i pikapaŭ. Elektramabili JAC vypuskaje ŭ partniorstvie z «Folksvahienam».
Čytajcie taksama: «Ceny źnizilisia, ale novych pastavak niama i nie čakajecca». Što adbyvajecca na rynku novych aŭto?
Ciapier čytajuć
Rasijskija i łukašenkaŭskija śpiecsłužby na fonie zalotu dronaŭ u Polšču praviali infaataku. Jaje zładžanaść daje padstavy dumać, što zalot byŭ spłanavany1515
Kamientary
Intieriesno druhoje. Apparat v Kitaje stoit 20.000 dołłarov. V RF budiet stoiť 60.000. Nu to jesť tajožnyj sojuz on vot takoj vot. Biessmyślennyj i biespoŝadnyj