«Što za dzirka?» Dziaŭčyna paskardziłasia na bukiet za 80 dalaraŭ ź minskaha sałona
Niadaŭna biełaruska aburyłasia bukietam, jaki joj zamovili ŭ padarunak u adnym ź minskich sałonaŭ. Dziaŭčyna była niezadavolena niaśviežaściu kvietak, ich kampazicyjaj i ŭpakoŭkaj, a taksama pamieram bukieta. Za 80 dalaraŭ jana čakała inšaha.
«Što heta za hulnia — čatyry zapar? Što ź jakaściu papiery?»
«Vy chočacie daviedacca, ad čaho ja płakała ŭčora paŭviečara? Pasprabujcie być abjektyŭnymi ŭ hetaj historyi, — pačała svoj raspovied jana ŭ storyz. — Pačniom z taho, što mnie prychodzić najmilejšaje sms, i ja razumieju, što mianie vyrašyli paradavać bukiecikam. Ale ŭ vyniku mnie pryjšła takaja kampazicyja. Jak vam jakaść kvietak i składańnie kampazicyi? Z ulikam taho, što kaštavaŭ jon 80$».
Dziaŭčyna piša, što fota zroblena adrazu paśla atrymańnia kvietak i nie redahavałasia, i praciahvaje:
«Kali chto mała raźbirajecca, ja pakažu, — publikuje jana čarhovuju storyz. — Što za dzirka? Jość adčuvańnie, što kvietačku skrali. Što heta za hulnia — čatyry zapar? Što ź jakaściu papiery? Čamu ŭsio takoje skamiečanaje? Kali vam hetaha niedastatkova, pahladzicie na pamier».
Pavodle słoŭ minčanki, jana jeździła ŭ ofis sałona — tam joj byccam adkazali, što heta jaje vina: nie pastaviła kvietki ŭ vadu, inačaj jany b paraspuskalisia.
«A dzie jany, prabačcie, paśpieli zavianuć? Ich kurjer vioz 10 chvilin, — ździŭlałasia aŭtarka storyz. — Viadoma, nijakich kampiensacyj i vybačeńniaŭ ja nie pačuła».
Taksama jana publikuje jašče adno fota z bukietam ružaŭ i śćviardžaje, što hetyja kvietki byli zamoŭlenyja ŭ tym ža sałonie. I znoŭ aburajecca:
«Vielizarny buton, jaki adrazu ž raspuściŭsia, i pobač maleńki. Vy bačycie, što ŭsie kvietki absalutna roznyja? U vyniku pałova ŭ mianie zahinuła praz dva dni, chacia ja ŭsio padrazała i trymała ŭ vadzie».
Fłarystka: «Pry atrymańni kvietak treba abaviazkova padrezać ich ściobły i pastavić raśliny ŭ ciopłuju vadu»
Z hetaj nahody «Naša Niva» pahutaryła ź Irynaj — prafiesijnaj fłarystkaj, jakaja maje niekalki hod navučańnia ŭ jeŭrapiejskaj ustanovie i dziesiać hod stažu ŭ kvietkavaj śfiery. My zapytali, ci mohuć kvietki zaviać za 10 chvilin, ci jość u kampazicyi hetych bukietaŭ zahany i čamu krama vykarystała pakamiečanuju ŭpakoŭku.
Pavodle słoŭ fłarysta, miarkujučy pa fota, bukiet składajecca z darahich sartavych pijonapadobnych ruž White O'Hara i takich ža kustavych Mansfield Park, a taksama sartavych dyjantusaŭ (hvaździkoŭ) Apple Tea.
«Jakraz zapar vystrailisia čatyry kustavyja pivonapadobnyja ružy Mansfield Park. Heta pryroda: na adnoj nožcy rastuć pa niekalki kvietak u roznyja baki. Heta jak u čałavieka — adno voka bolšaje, druhoje mienšaje, takaja pryroda, z hetym ničoha nie zrobiš, jana nie moža być idealnaj», — kaža Iryna.
Pa kampazicyi bukieta ŭ fłarystki niama zaŭvah. Naležna padabranyja kolery, kantrasty i kampazicyjny centr. A što da taho, što bukiet vyhladaje «stomlenym»?
«Fłaryst — heta čałaviek, jaki zachoŭvaje kvietki i nie daść im zahinuć. Pierad adpraŭkaj klijentam kramy trymajuć bukiety ŭ vadzie ŭ chaładzilniku — inšaje staŭleńnie da raślin mnie ciažka ŭjavić navat u kvietkavym łarku. Pieršymi siarod kvietak z hetaj historyi zavianuć ružy, a hvaździk uvohule vielmi mocny i ŭstojlivy. Taksama možna vyznačyć, ci była pastaŭlena raślina ŭ vadu, pa ściable — jano budzie zasochłym i paciamnieje. Hety kryteryj karysny i dla kupca, i dla pradaŭca, jakomu vystaŭlena pretenzija», — tłumačyć fłarystka.
Jana adznačaje, što znachodžańnie biez vady dla kvietak taki ž stres, jak i dla čałavieka adsutnaść pavietra. Navat paśla karotkaj trochchvilinnaj darohi kvietki treba adpaić.
«Za hety čas pory kvietki zabivajucca pavietram i mała jakija ź ich zastajucca adkrytymi, a praź ich raślina nasyčajecca vadoju», — havoryć Iryna.
Śpiecyjalist adznačaje: pry atrymańni kvietak treba abaviazkova padrezać ich ściobły i pastavić raśliny ŭ ciopłuju vadu, kab tyja «adžyli». Taksama nielha kidać kvietki na kanapu i kłaści na ich inšyja rečy (sumku i h.d.) — asabliva čullivyja da miechaničnych uździejańniaŭ ružy, ich pialostki nadta kvołyja.
Ci moža stacca tak, što kurjer sapsavaŭ bukiet? U teoryi tak, ale ž heta nie ŭ intaresach dastaŭščykaŭ (u tym liku tych, chto supracoŭničaje z «Jandeksam»).
«Pavodle damovy z kvietkavymi kramami, kiroŭcy niasuć adkaznaść za tavar, jaki dastaŭlajuć. Taksama kurjery majuć u sistemie sumu, jakuju pavinny buduć spłacić, kali tavar budzie paškodžany ŭ pracesie pieravozki ci nie dastaŭleny atrymalniku», — adkazvaje Iryna.
U dziaŭčyny, jakaja atrymała bukiet, była pretenzija i da ŭpakoŭki. Akazvajecca, heta sučasny trend, vykarystoŭvajecca papiera cišju: jana chrustkaja i miakkaja. Jaje mnuć naŭmysna — heta padobna da trendu ŭ dyzajnie interjeraŭ, kali meblu znarok starać dla prydańnia vintažnaści.
Zvyčajna viarnuć hrošy krama moža tolki zakazčyku, a nie atrymalniku bukieta, bo apošni jaho nie apłačvaŭ. Akramia taho, časta kramy pakazvajuć zakazčyku fota kančatkovaha varyjanta bukieta, ź jakim jon zhadžajecca.
Ciapier čytajuć
«Paŭstańnia takich pamieraŭ u Biełarusi nikoli nie było». Historyk raskazaŭ, čym unikalny 2020-ty i što my voźmiem ź jaho na budučyniu15
Kamientary
Nado było ochapku tiulpanov zakazať.