Biełaruskaja IT-śfiera štomiesiac stračvaje bolš za 1000 čałaviek
Statystyka za 11 miesiacaŭ śviedčyć pra toje, što adtok z IT-cfiery ŭ Biełarusi choć źmianšajecca, ale ŭsio adno zastajecca značnym. Asabliva ž uražvaje paraŭnańnie ź minułym hodam, piša Dev.by.
Za listapad ź biełaruskich IT-kampanij zvolniłasia 1932 čałavieki. Heta krychu mienš, čym u kastryčniku (na 2,5%), i druhi miesiac zapar zvolnienych mienš za 2 tysiačy čałaviek.
Ale ŭ paraŭnańni ź listapadam minułaha hoda kolkaść zvolnienych vyrasła na 42%, u toj čas jak u kastryčniku adnosna kastryčnika minułaha hoda roźnica była mienšaja — plus 34,5%.
U toj ža čas najom na pracy ŭ IT-śfiery ŭ listapadzie akazaŭsia minimalnym za šeść miesiacaŭ (červień—listapad). Kampanii pracaŭładkavali za hety miesiac usiaho 853 novych śpiecyjalistaŭ, i heta ŭ dva razy mienš, čym u listapadzie minułaha hoda, i na 8% mienš, čym u kastryčniku hetaha hoda.
Sumarna za 11 miesiacaŭ hetaha hoda ŭ IT-kampanii ŭładkavałasia kala 12 tysiač novych supracoŭnikaŭ — na 34% mienš, čym za anałahičny pieryjad minułaha hoda. Zvolniłasia ž za studzień—listapad bolš za 27 tysiač śpiecyjalistaŭ — na 75% bolš, čym za taki ž pieryjad 2021 hoda.
Takim čynam, ahulnyja straty IT-siektara za studzień-listapad 2022 hoda — bolš za 15 tysiač śpiecyjalistaŭ.
Kamientary