Biełarusa departavali z Polščy za niametavaje vykarystańnie pracoŭnaj vizy
Na miažy Litvy i Polščy polskija pamiežniki spynili biełarusa Alaksandra i anulavali jahonuju vizu. Pryčyna — niametavaje vykarystańnie rabočaj vizy. Taksama pamiežniki pastavili chłopcu piačatku z zabaronaj ujezdu na terytoryju Polščy na paŭhoda. Historyju Alaksandra zapisaŭ sajt MOST.
Sam Alaksandr — z Hrodna. U krasaviku 2022 hoda praź firmu-pasiarednika jon vyrašyŭ zrabić sabie pracoŭnuju vizu. Atrymaŭ zaprašeńnie i ŭ vizavym centry adkryŭ vizu na hod. U Polšču vyjechaŭ u červieni.
Adnak skłałasia tak, što ŭ Varšavie biełarus pracavaŭ zusim na inšaj pracy, a nie na toj, jakaja była prapisanaja ŭ zaprašeńni. Tak Alaksandr adpracavaŭ cełaje leta ŭ stalicy Polščy, a paśla staŭ jeździć u Biełaruś.
Na navahodnija śviaty chłopiec vyrašyŭ pabyvać u Biełarusi, a 10 studzienia viartaŭsia ŭ Polšču praź Litvu. Na miažy dźviuch krain jaho spynili polskija pamiežniki, kab pravieryć dakumienty.
«Pačali praviarać vizu i zaprašeńnie na pracu. Akazałasia, što firma, jakaja dapamahała ź vizaj, užo nieaktyŭnaja miesiacy z try. Zabrali ŭ pastarunak i skłali pratakoł», — raspavioŭ Alaksandr.
U pastarunku polskija pamiežniki pierakreślili Alaksandru vizu ŭ pašparcie i takim čynam anulavali jaje. Taksama jany pastavili piačatku z zabaronaj ujezdu na terytoryju Polščy na šeść miesiacaŭ.
«Dali mnie błok papiery i skazali ciaham 15 dzion vyjechać z terytoryi Polščy. Jašče skazali apłacić uznos u 10 złotych, napisać list i adpravić na ich adras. Z usioj hetaj historyi ja zrabiŭ vysnovu takuju: kali adzin raz prajechaŭ pa pracoŭnaj vizie, ale nie pracuješ pa zaprašeńni, to značyć treba zastavacca i pracavać tam. A ja pačaŭ jeździć u Biełaruś.
U ich ža ciapier nakštałt jak rejdy pačalisia pa pracoŭnych vizach. Niekatorym darujuć i kažuć prosta zrabić novaje zaprašeńnie, a mnie nie pašancavała. Sam vinavaty. Zaraz pryjdziecca čakać šeść miesiacaŭ, kab znoŭ pajechać u Polšču».
11 studzienia Alaksandr viarnuŭsia ŭ Biełaruś.
Što treba viedać inšaziemcu ŭ Polščy
U Centry padtrymki zamiežnikaŭ u Biełastoku fondu Okno na Wschód vydańniu MOST raskazali, što Alaksandr moh abskardzić rašeńnie pamiežnikaŭ. Viedamstva daje 15 dzion na abskardžańnie.
«Takich historyj u apošni čas šmat — niametavaje vykarystańnie vizy. Chłopcu jašče pašancavała, što tolki na šeść miesiacaŭ jamu dali zabaronu, a mahli i na niekalki hadoŭ. Viadoma, možna abskardzić rašeńnie, ale nie varta raźličvać na pazityŭny vynik. Kožny inšaziemiec u Polščy pavinien mieć sapraŭdny pašpart, vizu i dakumient, jaki paćviardžaje metu vydačy vizy (u vypadku pracoŭnaj vizy — dazvoł na pracu ad pracadaŭcy. Sapraŭdnaha, nie fiktyŭnaha). Kali čałaviek mianiaje pracadaŭcu — jon abaviazany mieć novy dazvoł ad novaha pracadaŭcy.
Z humanitarnymi vizami — vydajecca tym, chto dekłaruje ŭ konsulstvie, što ŭ Biełarusi im niebiaśpiečna zastavacca. Pry šmatrazovych pierasiačeńniach miažy na hetaj vizie ŭ pamiežnikaŭ mohuć uźniknuć pytańni i vašu vizu mohuć anulavać — bo vašy pajezdki nie apraŭdvajuć metu vydačy vizy. U tym liku možna atrymać i zabaronu na ŭjezd u Šenhien na peŭny termin (ad šaści miesiacaŭ da troch hadoŭ).
Heta datyčyć usich typaŭ viz: kožnaja viza maje metu vydačy, i vy abaviazanyja mieć dadatkovy dakumient, jaki jaje paćviardžaje».
Kamientary