2000 pažyłych dam sa Šviejcaryi padali ŭ JESPČ skarhu na zdaroŭje, klimat i ŭrad
Jeŭrapiejski sud pa pravach čałavieka ŭ sieradu pačnie razhladać pazoŭ ad vialikaj hrupy pažyłych šviejcarak, jakija abvinavačvajuć svoj urad u tym, što jon niedastatkova aktyŭna zmahajecca sa źmianieńniem klimatu, i heta parušaje ich prava na zdaroŭje i navat na žyćcio, piša Bi-bi-si.
Pazoŭ u JESPČ padała arhanizacyja KlimaSeniorinnen («Pažyłyja žančyny za klimat»). U jaje ŭvachodzić bolš za 2000 žycharak Šviejcaryi, čyj siaredni ŭzrost — 73 hady.
U Šviejcaryi klimat ciapleje chutčej, čym u siarednim pa płaniecie, i KlimaSeniorinnen śćviardžaje, prykłaŭšy da pazovu miedycynskija karty žančyn, što častyja chvali śpioki pahražajuć ich zdaroŭju i navat žyćciu. Tamu arhanizacyja prosić JESPČ abaviazać ułady Šviejcaryi bolš enierhična skaračać vykidy parnikovych hazaŭ.
U Šviejcaryi KlimaSeniorinnen za apošnija šeść hadoŭ užo prajhrała sudy va ŭsich instancyjach až da Viarchoŭnaha suda.
Urad Šviejcaryi maje namier dakazvać u JESPČ, što pazoŭ nie padlahaje razhladu, tak jak pravy pazoŭnic nie parušanyja ŭ dastatkovaj miery, kab źviartacca ŭ sud. Urad nie admaŭlaje, što źmieny klimatu mohuć upłyvać na zdaroŭje, ale, zhodna ź jaho arhumientacyjaj, u hetym pytańni nielha vyłučać upłyŭ klimatu mienavita na zdaroŭje pažyłych žančyn.
Kali Vialikaja pałata JESPČ u sieradu vyrašyć pryniać pazoŭ da razhladu, i tym bolš kali KlimaSeniorinnen u vyniku vyjhraje, heta moža stać surjoznym precedentam dla ŭsich 46 dziaržaŭ, jakija pryznajuć JESPČ. Abaroncy klimatu atrymajuć sihnał, što na ŭłady možna sprabavać cisnuć, akramia inšaha, i pa jurydyčnaj linii abarony pravoŭ čałavieka.
Źmianieńnie klimatu — pavyšeńnie siaredniaj tempieratury atmaśfiery — užo ciapier adčuvalna ŭpłyvaje na žyćcio ludziej i ŭsioj astatniaj bijaśfiery.
Navukoŭcy ličać, što dla taho, kab paźbiehnuć katastrafičnych nastupstvaŭ, čałaviectvu treba strymać pavyšeńnie siaredniaj tempieratury ŭ miežach 1,5 hradusa Celsija da 2100 hoda.
Kali hetaha nie atrymajecca zrabić, to, naprykład, Jeŭropie, pa prahnozach ekśpiertaŭ AAN, pahražajuć i niebyvałyja zalevy ź vialikimi pavodkami, i chvali zadušlivaj śpiakoty ź lasnymi pažarami.
Čytajcie jašče:
Nie zafiksavana ni adnaho vypadku, kab čałavieka vylečyli: chvaroba Alchiejmiera
Try mietady pieramahčy infarmacyjnuju pierahruzku ŭ śviecie, poŭnym rekłamy i škodnaj infarmacyi
Kamientary