«Miescaŭ u samalocie na ŭsich nie chopić». Cichanoŭskaja źviarnułasia da paplečnikaŭ Łukašenki
Demakratyčny lidar Biełarusi Śviatłana Cichanoŭskaja źviarnułasia pa paplečnikaŭ Łukašenki nakont situacyi, jakaja skłałasia vakoł špitalizacyi eks-kiraŭnika Biełhazprambanka Viktara Babaryki.
«Dapamažycie sabie — pakažycie Babaryku, — kaža Śviatłana Cichanoŭskaja. — Dahetul ni advakaty, ni svajaki Viktara Babaryki nie mohuć ubačyć, u jakim jon ciapier stanie. I takaja situacyja nie adzinaja. Pamahatyja Łukašenki siońnia nie ŭśviedamlajuć nastupstvy hetaha cisku na palitviaźniaŭ. Zrazumiejcie, pry luboj źmienie situacyi Łukašenka budzie ratavać tolki siabie. Kali pryjdzie čas nieści adkaznaść, kožny, chto ciapier jaho akružaje, akažacca sam pa sabie.
Sam pa sabie budzie Aleh Matkin (kiraŭnik Departamienta vykanańnia pakarańniaŭ), na jakoha Łukašenka zvalić usiu paŭnatu adkaznaści za niečałaviečyja ŭmovy, u jakich utrymlivalisia palitviaźni. Sam pa sabie budzie Andrej Švied (hienprakuror), jaki budzie raspłačvacca za ŭsie abvinavačvańni i zaprošanyja terminy. Sam pa sabie budzie Dźmitryj Hara (kiraŭnik SK), kali ŭsie hetyja rasśledavańni spraviadliva nazavuć sfabrykavanymi. Sam pa sabie budzie Ivan Kubrakoŭ (kiraŭnik MUS), bo za šmatrazovaje pieravyšeńnie paŭnamoctvaŭ, katavańni i śmierci zvyčajnych hramadzian, jakija adbylisia ŭ ich vyniku, chtości pavinien budzie adkazać.
Pieramieny ŭsio roŭna adbuducca, ale miescaŭ u samalocie nie chopić na ŭsich. Tolki vy sami možacie sabie dapamahčy. Pačynajcie rabić heta ciapier. Vychodźcie z nami na suviaź. Dzialiciesia infarmacyjaj. Zrabicie heta nie tolki dziela svajoj budučyni, ale i dziela taho, kab zastavacca čałaviekam», — zaklikała Śviatłana Cichanoŭskaja.
Čytać taksama:
«Dahetul u balnicy, stan siaredniaj ciažkaści». Što viadoma na hety momant pra stan Viktara Babaryki
«Uvieś čorny». Što apošniaje było viadoma pra Viktara Babaryku ŭ navapołackaj kałonii
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary