Ukraina stała chavać ad sajuźnikaŭ detali budučaha kontrnastupu — ŚMI
Ukraina chavaje ad svaich sajuźnikaŭ detali budučaha viasnovaha kontrnastupu, sprabujučy praduchilić uciečku tajnaj infarmacyi, jakaja moža naškodzić nastupalnaj apieracyi. Pra heta piša «Ukrainskaja praŭda» sa spasyłkaj na Politico.
Jeŭrapiejskija čynoŭniki raspaviali, što z-za ŭciečki tajnych dakumientaŭ ZŠA Kijeŭ ustrymlivajecca ad aznajamleńnia ź infarmacyjaj ab kontrnastupie. U pryvatnaści, ukrainskija kalehi nie dzielacca ź imi infarmacyjaj ab terminach, ab tym, dzie i kolki vojskaŭ płanujecca pierakinuć na pazicyi dla praviadzieńnia kontrnastupleńnia.
«Choć Ukraina, vierahodna, usio jašče dzielicca niekatorymi bazavymi raźviedvalnymi danymi z ZŠA i inšymi jeŭrapiejskimi krainami, jakija padtrymlivali jaje zbrojaj na praciahu minułaha hoda, čynoŭniki ŭnutry krainy pracujuć nad tym, kab praduchilić šyrokaje raspaŭsiudžvańnie detalaŭ, źviazanych z płanavańniem bajavych dziejańniaŭ», — paviedamili krynicy.
Ukrainski deputat, jaki havaryŭ z vydańniem na ŭmovach ananimnaści, raspavioŭ, što vysokapastaŭlenyja čynoŭniki ŭ Kijevie taksama chavajuć detali kontrnastupu ad inšych ukrainskich palitykaŭ. «Jość tolki niekalki čałaviek u krainie, jakija viedajuć hety płan», — skazaŭ deputat.
Pradstaŭnik Pientahona zajaviŭ, što nijakich źmien nie adbyłosia, i što Vašynhton i Kijeŭ pa-raniejšamu abmieńvajucca infarmacyjaj na papiarednim uzroŭni. «Nie było nijakich prykmiet taho, što Ukraina niešta chavaje ad ZŠA», — skazaŭ čynoŭnik.
Pradstaŭnik Rady nacbiaśpieki Biełaha doma Džon Kirbi zajaviŭ, što «ŭkraincy nie abaviazanyja paviedamlać nam niešta zahadzia».
«Amierykanskija i ŭkrainskija čynoŭniki padtrymlivajuć kantakt štodnia, tamu Vašynhton časta moža pra mnohaje zdahadvacca. ZŠA praciahvajuć pastaŭlać Ukrainie raźvieddanyja ŭ režymie realnaha času. My skancentravany nie na tym, ci paviedamiać nam zahadzia. My skancentravany na tym, kab u ich było ŭsio nieabchodnaje da taho času, kali jany buduć hatovyja da dziejańnia», — skazaŭ Kirbi.
Inšyja pradstaŭniki administracyi Bajdena śćviardžajuć, što Ukraina nikoli nie była całkam adkrytaj z ZŠA adnosna svaich vajennych płanaŭ. «Jany byli skupyja na infarmacyju z samaha pačatku», — skazaŭ amierykanski čynoŭnik.
Ciapier čytajuć
Pamior 50-hadovy śpiecnazaviec Bućko. Jon byŭ udzielnikam vykradańnia i zabojstva Zacharanki i Hančara15
Kamientary