Dźvie pryvatnyja ŭstanovy adukacyi vypłaciać u biudžet amal 3 miljony rubloŭ «za niepravamiernaje vykarystańnie padatkovych ilhot»
Tak, adna z ustanoŭ akazvała adukacyjnyja pasłuhi, metaj jakich, zhodna ź ich statutam, pavinna było stać nie atrymańnie prybytku, a zabieśpiačeńnie prava hramadzian na adukacyju.
Dźvie pryvatnyja ŭstanovy adukacyi vypłaciać u biudžet amal try miljony rubloŭ za niepravamiernaje vykarystańnie lhoty pa PDV, piša BiełTA.
Padatkovym zakanadaŭstvam Biełarusi praduhledžana vyzvaleńnie ad PDV abarotaŭ pa realizacyi płatnych pasłuh u śfiery adukacyi, za vyklučeńniem adukacyjnaj prahramy navučalnych kursaŭ, što realizujucca inšymi arhanizacyjami, jakija ŭ adpaviednaści z zakanadaŭstvam majuć prava ažyćciaŭlać adukacyjnuju dziejnaść.
«U toj ža čas padatkovymi orhanami vyjaŭlajucca niesumlennyja arhanizacyi, jakija pad vyhladam niekamiercyjnych ustanoŭ adukacyi karystajucca hetaj ilhotaj pa padatkaabkładańni, faktyčna ažyćciaŭlajučy kamiercyjnuju dziejnaść», — adznačyli va ŭpraŭleńni raźvićcia padatkovych orhanaŭ Ministerstva padatkaŭ i zboraŭ.
Tak, pryvatnaja ŭstanova adukacyi «Z» akazvała adukacyjnyja pasłuhi, metaj jakich, zhodna ź ich statutam, pavinna było stać nie atrymańnie prybytku, a zabieśpiačeńnie prava hramadzian na adukacyju. U toj ža čas «Z» pravodzilisia płatnyja adukacyjnyja kursy, a atrymany prybytak raźmiarkoŭvaŭsia pamiž zasnavalnikami arhanizacyi. U nastupnym dziejnaść pa akazańni adukacyjnych pasłuh ažyćciaŭlałasia ad imia pryvatnaj ustanovy adukacyi «S», jakaja źjaŭlajecca pravapierajemnikam «Z».
Pa vynikach pravierak ustanoŭlena, što dziejnaść hetych kampanij była nakiravana na sistematyčnaje atrymańnie prybytku, što nie adpaviadała adlustravanym u statutach metam dziejnaści ŭstanoŭ. Jany byli stvorany jak niekamiercyjnyja arhanizacyi ŭ formie ŭstanovy adukacyi. «Arhanizacyi, majučy prykmiety ažyćciaŭleńnia kamiercyjnaj dziejnaści i realizujučy adukacyjnyja prahramy navučalnych kursaŭ, faktyčna adnosilisia da katehoryi inšych arhanizacyj, jakim zakanadaŭstvam dadziena prava ažyćciaŭlać adukacyjnuju dziejnaść, ale biez vyzvaleńnia ad PDV abarotaŭ pa realizacyi navučalnych kursaŭ», — udakładnili ŭ Ministerstvie padatkaŭ i zboraŭ.
Pa vynikach pravierak ustanova adukacyi «Z» pavinna vypłacić 1,81 młn rubloŭ, ustanova adukacyi «S» — 1,18 młn; u dačynieńni da słužbovych asob arhanizacyj raspačata kryminalnaja sprava.
Jakija heta ŭstanovy, Minpadatkaŭ nie piša.
Kamientary