«Piakielnaje połymia epochi Bałsanaru». Pačaŭsia sud nad «brazilskim Trampam»
U Viarchoŭnym vybarčym sudzie Brazilii ŭ čaćvier pačaŭsia sud nad byłym prezidentam Žairam Bałsanaru. Jon abvinavačvajecca ŭ raspaŭsiudzie chłuśni ab patencyjnych padtasoŭkach na vybarach. Turma pa hetaj spravie Bałsanaru nie pahražaje, zatoje pahražaje zabarona bałatavacca.
Žair Bałsanaru abvinavačvajecca ŭ złoŭžyvańni prezidenckaj uładaj u vyhladzie raspaŭsiudu łžyvych śćviardžeńniaŭ, a mienavita ŭ tym, što ŭ minułym lipieni, pierad prezidenckimi vybarami, jon sabraŭ zamiežnych pasłoŭ i zajaviŭ im, što elektronnyja mašyny dla hałasavańnia, jakija prymianiajucca ŭ Brazilii, uraźlivyja pierad chakierami, i tamu jaho praciŭniki mohuć padtasavać vyniki vybaraŭ, jak piša Bi-bi-si.
Vybary prezidenta prajšli ŭ kastryčniku 2022 hoda, i Bałsanaru ich prajhraŭ, zusim trochi sastupiŭšy ŭ druhim tury levamu vieteranu brazilskaj palityki Łuisu Inasiu «Łule» da Siłvie.
Sprava, jakuju razhladaje Viarchoŭny vybarčy sud, nie kryminalnaja, turma Žairu Bałsanaru pa joj nie pahražaje, ale sudziejskaja kalehija maje prava na vosiem hadoŭ zabaranić 68-hadovamu eks-prezidentu bałatavacca na vybarnyja pasady.
Adnačasova Bałsanaru — padśledny pa niekalkich kryminalnych spravach, pracesy pa jakich jašče nie pačalisia.
Bałsanaru paśla vybaraŭ i biesparadkaŭ, jakija zładzili jaho prychilniki palacieŭ u ZŠA, u Fłarydu, ale zatym viarnuŭsia na radzimu.
Ci źbirajecca jon vyłučacca na prezidenckich vybarach u 2026 hodzie, jon jašče nie kazaŭ, a tolki paabiacaŭ dapamahčy Libieralnaj partyi, u jakoj jon hanarovy staršynia, na miascovych vybarach u nastupnym hodzie.
Bok abvinavačvańnia śćviardžaje, što vystup Bałsanaru pierad pasłami 18 lipienia 2022 hoda byŭ parušeńniem zakona ab vybarach. Sam eks-prezident śćviardžaje, što jon tolki tłumačyŭ zamiežnym dypłamatam, jak pracuje vybarčaja sistema ŭ Brazilii.
Pravaha papulista Bałsanaru časta paraŭnoŭvali z Donaldam Trampam, i pavodziny brazilskaha prezidenta i jahonych prychilnikaŭ paśla projhryšu na vybarach taksama nahadvali toje, što adbyłosia hodam raniej u ZŠA.
Paśla projhryšu Łule ŭ druhim tury 30 kastryčnika z razryvam usiaho ŭ 1,8% Bałsanaru admoviŭsia naŭprost pryznavać parazu, choć i rasparadziŭsia pačać padrychtoŭku da pieradačy ŭłady. Praz dva miesiacy, pierad samaj inaŭhuracyjaj Łuły, jon palacieŭ u ZŠA.
Prychilniki Bałsanaru adrazu paśla vybaraŭ pačali błakavać darohi, a paśla inaŭhuracyi Łuły, 8 studzienia, zachapili i razhramili prezidencki pałac, a taksama budynki parłamienta i Viarchoŭnaha suda.
Palicyja aryštavała paŭtary tysiačy ŭdzielnikaŭ hetych biesparadkaŭ. Pa hetaj spravie idzie śledstva, i pravaachoŭnyja orhany padazrajuć Bałsanaru ŭ padbuchtorvańni da biesparadkaŭ.
Praces, jaki pačaŭsia ŭ čaćvier u Viarchoŭnym vybarčym sudzie, — heta jurydyčna asobnaja sprava, i ŭ im kalehija ź siami sudździaŭ prostaj bolšaściu pavinna budzie vyrašyć, ci sprabavaŭ Bałsanaru svaim vystupam pierad pasłami niezakonna paŭpłyvać na vybarščykaŭ i ci treba jamu za heta zabaranić bałatavacca ŭ najbližejšyja hady.
Sam Bałsanaru na pieršym pasiadžeńni nie prysutničaŭ, a jahony advakat zajaviŭ, što eks-prezident maje namier abskardzić pastanovu suda, kali jana budzie nie na jahonuju karyść.
Zrešty, jak adznačaje ahienctva Reuters, całkam mahčyma, što znoŭ vyłučać Bałsanaru nie zachočuć jaho ž byłyja prychilniki.
«Značnaja častka brazilcaŭ, padobna, vielmi choča pakinuć zzadu piakielnaje połymia epochi Bałsanaru», — piša karespandent ahienctva.
Ź jahonych słoŭ, niekatoryja z pravych palitykaŭ, byłych sajuźnikaŭ eks-prezidenta, ciapier publična ŭskładajuć nadziei na inšyja fihury na pravym fłanhu.
Ciapier čytajuć
Biełaruski IT-miljarder Hurski: Maju pieršuju žonku zabiŭ hiembler2
Kamientary