«Biełaruskimi Maldyvami» nazyvajuć adpracavanyja krejdavyja karjery AAT «Krasnasielskbudmateryjały» — vadajomy z vadoj niezvyčajna jarka-biruzovaha koleru, dzie tak lubiać fatahrafavacca i, na žal, kupacca biełarusy.
Ciapier ich možna budzie naviedać aficyjna. Paŭtarahadzinnaja ekskursija ŭklučaje naviedvańnie muzieja zavoda i ahladnaj placoŭki, ź jakoj adkryvajecca niezvyčajny vid, jak piša «Hrodzienskaja praŭda».
«My padumali, što było b niadrenna złučyć u adnym maršrucie vytvorčaść i pryhožy łandšaft. Tak naradziłasia zadumka z uładkavańniem naziralnaj placoŭki. U pramysłovy turystyčny maršrut abjekt uklučyli ź leta minułaha hoda, — kaža namieśnik hiendyrektara Hienadź Najdziuk. — Ličym, atrymałasia hodna, pryhoža, a hałoŭnaje, biaśpiečna. Apošni aśpiekt asabliva važny. Bo krejdavyja karjery, niahledziačy na zabaronu naviedvańnia, zaŭsiody pryciahvali amataraŭ adpačynku na pryrodzie, fotasiesij, ekstremałaŭ. A ciapier u ich źjaviłasia lehalnaje miesca, dzie možna atrymać asałodu ad miascovaj pryhažości, ubačyć karjery i zrabić fota na pamiać. Ustalavali biaśpiečnuju płatformu z aharodžaj, jakaja pieraškadžaje padychodu ludziej da stromkich schiłaŭ karjera».
Šlach da naziralnaj placoŭcy niadoŭhi: ad pradpryjemstva da patrebnaha punkta kiłamietraŭ z vosiem. Vychodziš z mašyny — i pierad vačyma adkryvajecca malaŭničy vid na avalnuju čašu, zapoŭnienuju vadoj.
«Płošča — 54 hiektary, hłybinia — da 50 mietraŭ. Ź placoŭki prahladajecca maštabnaść. Možna ŭbačyć uvieś karjer całkam, na stromych schiłach razhledzieć płasty roznych koleraŭ. Darečy, jakraz tut byŭ znojdzieny adbitak ryby vidu chopłapteryks, jaki možna ŭbačyć u muziei, — kaža Hienadź Najdziuk. — Raskažuć tut i pra technałohiju zdabyčy krejdy. Paśla taho jak resurs karjera vyčarpany, technika pieravodzicca na novyja ŭčastki, a hety, dzie vialisia raboty, zapaŭniajecca naturalnym čynam. Biełaja krejda na dnie nadaje vadzie toj samy niepaŭtorny błakitnavata-biruzovy koler. Pryjemna sieści na łaŭcy i pasiadzieć u cišyni, atrymać asałodu ad pryrody».
Ci buduć dastupnyja turystam inšyja adpracavanyja karjery, na pradpryjemstvie havaryć nie biarucca. Pa słovach Hienadzia Najdziuka, pakul u płanach udaskanaleńnie hetaha turystyčnaha maršrutu.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1414
Kamientary