Suravikin «u adnym miescy, ale nie ŭ turmie». Što pišuć pra los rasijskaha hienierała
Supiarečlivaja infarmacyja raspaŭsiudžvajecca nakont rasijskaha hienierała Siarhieja Suravikina.
Učora vydańnie The Moscow Times sa spasyłkaju na dźvie svaje krynicy, blizkija da aparatu Minabarony, paviedamiła, što namieśnik kamandujučaha Abjadnanaj hrupoŭkaj rasijskich vojskaŭ va Ukrainie hienierał Siarhiej Suravikin aryštavany. Adna z krynic vydańnia śćviardžała, što aryšt źviazany ź miaciažom Pryhožyna.
Raniej vydańnie The New York Times paviedamlała sa spasyłkaj na čynoŭnikaŭ ZŠA, znajomych z raźvieddanymi, što Suravikin nibyta zahadzia viedaŭ pra płany Jaŭhiena Pryhožyna pačać uzbrojeny miaciež suprać vajskovaha kiraŭnictva Rasii. Ale heta infarmacyja tak i zastałasia niepaćvierdžanaj.
Siońnia vydańnie The Financial Times sa spasyłkaj na svaje krynicy napisała, što Suravikin zatrymany.
FT dadało, što zastajecca niezrazumiełym, ci źviazana heta z abvinavačańniem hienierała va ŭdziele ŭ miaciažy Jaŭhiena Pryhožyna abo jaho zatrymlivali dla dopytu.
A voś dačka Suravikina Vieranika paviedamiła «Bazie», što z baćkam «ničoha nie adbyłosia», jon znachodzicca na svaim pracoŭnym miescy. Ale skazała jana pra heta nie nadta ŭpeŭniena.
Žonka Suravikina admoviłasia kamientavać paviedamleńni pra aryšt muža.
Pres-sakratar Kramla Dźmitryj Piaskoŭ taksama admoviŭsia ad kamientaroŭ i paraiŭ źviarnucca z pytańniem u Ministerstva abarony.
Vydańnie «Važnyje istorii», u svaju čarhu, napisała, što Suravikin nie zatrymany.
Jak zajavili surazmoŭcy vydańnia, blizkija da Hienštaba i FSB, hienierała dapytali, a zatym adpuścili.
Pavodle infarmacyi ahienctva Bloomberg, Suravikina na praciahu niekalkich dzion dapytvali vajskovyja prakurory ab jaho suviaziach z kiraŭnikom PVK «Vahnier» Jaŭhienam Pryhožynym. Sa słoŭ surazmoŭcy ahienctva, hienierał «utrymlivajecca ŭ adnym miescy, ale nie ŭ turmie».
Aficyjnych kamientaroŭ nakont losu Suravikina nie było.
Siarhieja Suravikina pryznačyli kamandujučym rasijskimi vojskami va Ukrainie ŭ kastryčniku 2022 hoda. U studzieni 2023 jaho źniali. Kamandujučym tak zvanaj Abjadnanaj hrupoŭkaj vojskaŭ byŭ pryznačany načalnik Hienštaba hienierał armii Valeryj Hierasimaŭ. Suravikin staŭ namieśnikam Hierasimava.
Padčas miaciažu Pryhožyna Suravikin vystupiŭ ź videapaviedamleńniem, u jakim zaklikaŭ vahnieraŭcaŭ spynicca.
U Homieli siłaviki ŭznaharodzili tajamničych hierojaŭ. Chto jany?1
Kamientary