U Vilni napiaredadni samitu NATO adbyłasia kibierataka. Prapahandysckija paviedamleńni hučali pa radyjo i ŭ handlovym centry
Napiaredadni Vilenskaha samitu NATO ŭ Litvie fiksujucca kibierataki. Byli ŭzłamany IT-sistemy litoŭskaj rehijanalnaj radyjostancyi i handlovaha centra i zapuščany paviedamleńni, nakiravanyja suprać NATO i pastavak zbroi va Ukrainu, paviedamlaje LRT.
U niadzielu ŭ Litvie było zafiksavana dźvie surjoznyja kibierataki, kali z dapamohaj uzłomu IT-sistem adnoj z rehijanalnych radyjostancyj i adnaho z supiermarkietaŭ zamiest zvykłych muzyčnych ci inšych paviedamleńniaŭ było zapuščana antynataŭskaje pasłańnie.
Słuchačam radyjostancyi i naviedvalnikam handlovaha centra było razasłana paviedamleńnie, u jakim utrymlivałasia prapahanda suprać NATO, suprać pastavak zbroi va Ukrainu i zaklik da pieramoŭ, a nie da vajny.
Pravakacyja była chutka spynienaja, bo ludzi, jakija čuli zapis, raspaviali LRT.lt, što paviedamleńnie było dublavana aŭtamatyčnym pierakładčykam Google, a pa tym, jak hučali niekatoryja frazy, možna było mierkavać, što jano pierakładziena z ruskaj movy.
U aŭtorak i sieradu, kali ŭ Litvie projdzie samit NATO, imaviernaść takich atak uzraście.
Nacyjanalny centr kibierbiaśpieki (NCSC) paćvierdziŭ, što taki incydent sapraŭdy mieŭ miesca.
«Heta pieršy vypadak uzłomu [aŭdyja]sistem», — skazaŭ Ludas Ališaŭskas, dyrektar Nacyjanalnaha centra kibierbiaśpieki.
Pakul viadziecca rasśledavańnie, nie paviedamlajecca, u jakim handlovym centry i na jakoj radyjostancyi prahučała paviedamleńnie chakiera.
«Havorka idzie pra vielmi papularny anłajnavy servis, dzie radyjostancyi i handlovyja centry kuplajuć pasłuhu i atrymlivajuć licenzijny kantent, muzyku dla ahučvańnia hetaj abstanoŭki», — prakamientavaŭ Ł. Ališaŭskas.
Akramia taho, ciapier viaducca metanakiravanyja DDoS-ataki na Litvu, jakimi zajmajucca adkaznyja orhany. Takim napadam padvierhlisia sistema m.Ticket i sajt GoVilnius.lt.
Ciapier čytajuć
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie30
Kamientary