U Litvie znajšli vykradzienych dva tydni tamu dziaciej. Ich chacieli vyvieźci ŭ Biełaruś

Pradstaŭnik Departamienta palicyi Litvy aficyjna paviedamiŭ, što vykradzienyja niekalki tydniaŭ tamu ŭ Koŭnie małaletnija dzieci byli znojdzienyja. 

Palicyja paviedamlaje, što siamja była zatrymanaja siońnia ŭ 12:50 zusim blizka ad miažy ź Biełaruśsiu. Mužčyna, jaki kiravaŭ aŭtamabilem Ford Focus, pakazaŭ pamiežnikam niamieckija dakumienty, razmaŭlaŭ pa-niamiecku, a kali pamiežniki stali vyvučać dakumienty, sprabavaŭ źjechać.

«Zatrymanyja pakazali falšyvyja dakumienty. Jany zatrymanyja za 1 km ad miažy ź Biełaruśsiu, miarkujecca, što jany płanavali nielehalna pierajści miažu», — zajaviła palicyja.

Prakuror Darus Vałkavičus skazaŭ, što ciapier rasśledujuć vykradańnie dziaciej. Pavodle jaho słoŭ, całkam mahčyma, što siamja płanavała nielehalna pierasiačy miažu ź Biełaruśsiu ŭ Ihnalinskim rajonie. Jość viersija, što jany mahli prasić prytułku ŭ Biełarusi.

Za vykradańnie dziaciej baćkam pahražaje štraf, abmiežavańnie voli, aryšt abo pazbaŭleńnie voli na termin da dvuch hadoŭ.

Vykradzienych dziaciej sud pastanaviŭ zabrać ź siamji ŭ mai 2023 hoda za toje, što dzieci nie naviedvali škołu i dziciačy sad, baćki nie stvarali ŭmovy dla sacyjalizacyi dziaciej, sami baćki zajavili, što litoŭskija zakony im nie ŭkaz.

Baćka dziaciej zajaviŭ, što źjaŭlajecca pradstaŭnikom ruchu suvierennych hramadzian. Ludzi, jakija źjaŭlajucca prychilnikami hetaha ruchu, nie pryznajuć pravavoj sistemy i dziaržavy, zajaŭlajuć, što źjaŭlajucca pryvatnymi kampanijami, jakija nikomu nie naležać.

Pra niebiaśpieku hetaha ruchu letaś papiaredžvaŭ Departamient dziaržbiaśpieki paśla taho, jak u Hiermanii byli zatrymanyja 25 siabroŭ hetaha ruchu, jakija płanavali ataku suprać parłamienta krainy. Paviedamlałasia, što ludzi, jakija abviaścili siabie «suvierenami», vierać, što abmiežavańni, jakija dziejničajuć u dziaržavie, na ich nie raspaŭsiudžvajucca.

«Niekalki dziasiatkaŭ suvierenaŭ, jakija ličać siabie hramadzianami SSSR abo ŁSSR, aktyŭna dziejničajuć i ŭ Litvie. Niekatoryja ź ich publična zajaŭlajuć pra svaju nastalhiju pa savieckim časie, pra pavahu da pomnikaŭ savieckim vajskoŭcam, raniej jany supracoŭničali z prakramloŭskimi prapahandystami ŭ Litvie, jeździli ŭ Biełaruś «palapšać» dvuchbakovyja adnosiny i stanoŭča aceńvali režym hetaj krainy», — paviedamlaŭ Departamient. 

Čytajcie taksama:

Łatuška pieradaŭ Ukrainie źviestki pra dziaciej, jakich vyvieźli ŭ Biełaruś i pieradali Rasii dla ŭsynaŭleńnia

U Biełaruś z akupavanaha Danbasa było vyvieziena try tysiačy dziaciej

ZŠA tajemna padzialilisia z Haahaj dokazami rasijskich vajennych złačynstvaŭ va Ukrainie — The New York Times

• 7
• 0
• 4
• 54
• 11
• 11
• 27
• 0