Chodzić pa Mazyry z aŭtamatam: małady baćka pajechaŭ vajavać za Rasiju i nie chavaje hetaha
Małady baćka dvaich dziaciej Dźmitryj Kažarski pracavaŭ u kałhasie i hateli, ale potym raptam vyrašyŭ stać «vahnieraŭcam». Pra nietypovaha najmita sa śpisu «Chaču žyć» raskazaŭ «Fłahštok».
Dźmitryj Kažarski z Mazyra, jamu 26 hadoŭ. Heta prosty chłopiec ź mikrarajona Pchoŭ, depresiŭnaj mazyrskaj uskrainy. Kažarski paśpieŭ papracavać u kałhasie i na «Mazyrsoli». U Biełarusi kryminału za im nie było — pryciahvaŭsia tolki da administracyjnaj adkaznaści za drobnyja pravaparušeńni.
Apošniaje miesca pracy Kažarskaha ŭ Biełarusi — mazyrski hatel «Prypiać» (maj 2022 hoda). A paśla małady čałaviek ź siaredniaj adukacyjaj, žonkaj i dźviuma dočkami staŭ najmitam rasijskaj PVK «Vahnier» i adpraviŭsia na vajnu suprać Ukrainy.
Dakładnuju datu, kali mazyranin staŭ šturmavikom «Vahniera», nazvać składana, ale šeŭron i ściah z fatahrafij, jakija jon publikuje ŭ sacsietkach, śviedčać, što, chutčej za ŭsio, heta adbyłosia jašče pry Jaŭhienie Pryhožynie.
Ciapier, mierkujučy pa šeŭronach, Kažarski pryviazany da 417-ha asobnaha raźviedvalnaha bataljona, jaki dziejničaŭ, u pryvatnaści, na Zaparožskim kirunku. Taksama prasočvajecca jaho prynaležnaść v/č 47084 — heta 58-ja ahulnavajskovaja armija Paŭdniovaj VA VS RF, jakaja dysłakujecca va Uładzikaŭkazie. Hetaja armija brała ŭdzieł u dźviuch Čačenskich vojnach, vajnie suprać Hruzii, a ciapier vajuje suprać Ukrainy.
Dźmitryj apublikavaŭ fota paśviedčańnia bajavoj uznaharody «Kryž šturmavy» pa zahadzie kamandzira v/č 47084 ad maja 2024 hoda (adpaviednaje paśviedčańnie vydadziena 23 lutaha 2025 hoda) i hramaty «za ŭzornaje vykanańnie słužbovych abaviazkaŭ» ad časovaha vykanaŭcy abaviazkaŭ kamandzira 42-j hvardziejskaj motastrałkovaj dyvizii, raźmieščanaj u Hroznym, — taksama ŭ 2024 hodzie.
Fatahrafii na staroncy Kažarskaha śviedčać pra toje, što jon časta byvaje na poŭdni Rasii, i, vierahodna, maje mahčymaść viartacca dadomu. Siarod fotazdymkaŭ jość zdymki z aŭtamatami — najmit hulaje z AK pa rodnym Pchovie i pakazvaje aŭtamaty mazyrskim siabram. Mierkavać pra toje, ci źjaŭlajecca zbroja bajavoj, davoli ciažka — jana vizualna nie adroznaja ad hulniavych vyrabaŭ.
Nahadajem, najmictva zabaroniena biełaruskimi zakonami. Ale ŭ realnaści vahnieraŭcy svabodna dysłakavalisia ŭ Biełarusi.
Frantavych fatahrafij u mužčyny niašmat: technika šturmavoha adzieła — matacykł, džyp i kvadracykł, zaniatyja viaskovyja damy (vierahodna, na akupavanych terytoryjach). Na hrupavych fatahrafijach sasłužyŭcy, čaściej za ŭsio z Rasiji, ale jość na fota i najmity-zamiežniki — afrykaniec i azijat.
Uvohule, najmit nie saromiejecca svajho ŭdziełu ŭ ahresii suprać Ukrainy. Pazyŭny «Pchoŭ» Kažarski ŭziaŭ pa rajonie svajho pražyvańnia. Fatahrafiju asabistaha žietona (PVK, 7 ŠV, 4 ŠO, Pchoŭ, S-9850) i svoj aŭtohraf na ściahu šturmavoha adzieła 4-ha ŭzvoda hrupy Vahniera z pazyŭnymi jon taksama publikavaŭ na svajoj staroncy.
Na hety momant Dźmitryj Kažarski, napeŭna, žyvy — na svaju staronku ŭ «Adnakłaśnikach» jon zachodziŭ zusim niadaŭna.
«Ženia ŭ nas nohi straciŭ». Na parad u Minsk pryjechali vahnieraŭcy-biełarusy — raskazvajem, chto jany
Vajavać za Rasiju pajšoŭ były palitviazień z Homiela. U Biełarusi jon u śpisie «terarystaŭ»
Vajujučy za Rasiju, zahinuŭ były rabotnik minskaha HUMa
Miedsiastra ź Lepiela zakachałasia ŭ rasijskaha vajskoŭca i pajechała najomnicaj na front va Ukrainu
Ukrainski prajekt «Chaču žyć» nazvaŭ imiony bolš za 700 biełarusaŭ, jakija vajavali na rasijskim baku POŬNY ŚPIS
Ciapier čytajuć
Vybityja dźviery, maski-šou, zatrymańnie top-mieniedžaraŭ. Pačaŭsia pahrom «Jeŭraopta»25
Kamientary