Uładzimir Zialenski siońnia prybyŭ u Ankaru dla praviadzieńnia pieramovaŭ z tureckim lidaram Redžepam Erdahanam i abmierkavańnia mahčymych krokaŭ dla spynieńnia vajny. Jak paviedamili ŭ Kijevie, paśla sustrečy z Erdahanam prezident Ukrainy prymie rašeńnie ab dalejšych dziejańniach.
Pry hetym krynica CNN u MZS Turcyi paviedamiła, što aficyjnaja sustreča delehacyj Rasii i Ukrainy pakul nie zapłanavanaja. U Kramli raniej anansavali, što pieramovy projduć u druhoj pałovie dnia.
Na pieramovach u Stambule intaresy Ukrainy mohuć pradstaŭlać kiraŭnik SBU Vasil Maluk, ministr abarony Rustem Umieraŭ i načalnik Hienštaba Andrej Hnataŭ, jakija ŭžo prybyli ŭ Turcyju.
Zialenski zajaviŭ, što hatovy sustrecca z Uładzimiram Pucinym asabista, adnak Rasija, pavodle słoŭ ukrainskaha lidara, nakiravała ŭ Stambuł «mulažnuju» delehacyju, nie ŭpaŭnavažanuju na realnyja pieramovy. Kreml vyklučyŭ udzieł Pucina, a ŭ rasijskuju delehacyju ŭvajšli tolki čynoŭniki, jakija ŭdzielničali ŭ niaŭdałych pieramovach u 2022 hodzie.
Tym časam aficyjny pradstaŭnik prezidenta Turcyi paviedamiŭ, što Erdahan budzie patrabavać nieadkładnaha spynieńnia ahniu i pačatku realnych mirnych pieramovaŭ. Pavodle jaho słoŭ, Ankara abmiarkoŭvaje ź Zialenskim «usie aśpiekty biahučych padziej».
Ciapier čytajuć
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła33
Kamientary