Žonka Biekchema sprabavała raskazać pra pachodžańnie z rabočaha kłasa. Devid dacisnuŭ, i jana skazała praŭdu
4 kastryčnika stryminhavy servis Netflix vypuściŭ dakumientalny sieryjał pra zornaha eks-futbalista zbornaj Anhlii i «Mančester Junajted», a ciapier adnaho z ułaśnikaŭ «Inter Majami» Devida Biekchema. Stužka składajecca z čatyroch epizodaŭ, kožny ź jakich doŭžycca bolš za hadzinu. U pieršaj sieryi, siarod inšaha, žonka byłoha spartsmiena Viktoryja raspaviała historyju znajomstva z Devidam, piša Tribuna.com.
— Ja ŭvohule nie lublu futboł! Nie lubiła tady, nie lublu i ciapier. Ale ja bačyła jaho fota ŭ časopisach, i jon vidavočna byŭ vielmi simpatyčnym junakom. Ja chadziła da jaho na hulni nie tamu, što pieraśledvała, mnie prosta chaciełasia pabačycca.
Adnojčy ja ŭbačyła, jak paśla matča futbalisty pajšli ŭ bar, a Devid razmaŭlaŭ z baćkami. Ja vielmi blizkaja sa svajoj siamjoj, i mnie spadabałasia hetaja jahonaja rysa charaktaru.
Biekchem ža byŭ nie taki šmatsłoŭnym:
— Kali ja ŭpieršyniu ź joj zahavaryŭ, ja prosta zakachaŭsia! — łakanična raspavioŭ Devid.
A dalej zdaryŭsia vielmi kamičny epizod: Viktoryja pačała raskazvać, što jany z mužam vyjšli z «rabočaha kłasa». Biekchem, jaki ŭ hety momant znachodziŭsia ŭ inšym pakoi, źjaviŭsia ŭ kadry i litaralna prymusiŭ žonku raskazać praŭdu.
— My aboje byli rodam z rabočych siamiej, našy baćki pracavali nie pakładajučy ruk. My pradstaŭniki rabočaha kłasa…
— Kažy ščyra! — adčyniaje dźviery Biekchem.
— Ja tak i rablu!
— Biez chłuśni.
— Ja i tak ščyraja!
— Na jakoj mašynie ciabie ŭ škołu vazili?
— Moj baćka…
— Prosta adkažy.
— Moj baćka…
— Što heta była za mašyna?
— Tut prosta nie adkažaš…
— Na jakoj mašynie baćka vaziŭ ciabie ŭ škołu?
— Kali jak…
— Nie!
— Dobra, u 80-ja ŭ baćki byŭ Rolls-Royce, — zdałasia Viktoryja.
— Dziakuj, — adkazaŭ zadavoleny Biekchem i źnik. Žonka ža takim «dopytam» vidavočna była niezadavolenaja.
Devid i Viktoryja ažanilisia 24 hady tamu. U šlubie ŭ ich naradziłasia čaćviora dziaciej: syny Bruklin, Ramea, Kruz i dačka Charpier. Siaredni syn Biekchema — Ramea — taksama staŭ futbalistam. Ciapier jon vystupaje ŭ druhoj kamadzie «Brentfarda» na pazicyi forvarda.
Ciapier čytajuć
Kab doŭha nie stajać na miažy z Polščaj, dziaŭčyna skarystałasia łajfchakam. Vynik: viza zhareła, vandroŭka sapsavanaja6
Kamientary