«Nie znajšoŭ u prodažy śvinych kapytoŭ i vyrašyŭ paviedamić pra heta ŭ abłvykankam». Jakija jašče pytańni chvalujuć ludziej na Homielščynie?
Pieršy namieśnik staršyni Homielskaha abłvykankama Dźmitryj Pietražycki 11 listapada pravioŭ telefonnuju liniju z žycharami vobłaści. Pavodle paviedamleńnia dziaržaŭnaj presy, za čas pracy linii da čynoŭnika źviarnulisia 24 čałavieki, i «pytańni, jakija patrabujuć detalovaha analizu, uziatyja na kantrol».
Prablemy, jakija stavilisia pierad Dźmitryjem Pietražyckim, u asnoŭnym tyčylisia aciapleńnia damoŭ i ŭstanoŭ, vodazabieśpiačeńnia, zakryćcia kramaŭ u nievialikich nasielenych punktach. Adna žančyna pastaviła pytańnie «prybirańnia na mohiłkach viekavych avaryjnych sosnaŭ, jakija pry padzieńni mohuć prynieści materyjalnuju škodu», a žycharku haradskoha pasiołka Kamaryn na Brahinščynie zaniepakoiła toje, što ŭ jaho prychodziać ź lesu lisy.
Ale aprača takich zvyčajnych bytavych pytańniaŭ prośby niekatorych ludziej vyhladali davoli ekzatyčna.
Tak,
«hamialčuk Michaił Ivanavič nie znajšoŭ u prodažy śvinych kapytoŭ i vyrašyŭ paviedamić pra heta ŭ abłvykankam».
Maryja Dźmitryjeŭna z ahraharadka Kaševičy Pietrykaŭskaha rajona
«prasiła pašyryć asartymient pramysłovych i rytualnych tavaraŭ u kompleksna-pryjomnym punkcie, narakała, što trunu kupić u vioscy niama dzie».
Jak paviedamlajecca pa vynikach telefonnaj linii, «kožny, chto źviarnuŭsia, uvažliva vysłuchany, atrymaŭ tłumačeńni, a pytańni, jakija patrabujuć detalovaha analizu, uziatyja na kantrol».
Kamientary