«Samaadčuvańnie lepšym nie robicca». Ad Ryhora Kastusiova pryjšoŭ pieršy list z PKT
Palityk maje ankałahičnuju chvarobu, niepakoicca ab lekach, pieražyvaje, što zapłanavanaha spatkańnia tak i nie było.
Pra nastroj Ryhora Kastusiova Radyjo Svaboda raskazaŭ jahony ziać Źmicier Antončyk, jaki ź siamjoj žyvie ŭ Polščy.
«Vielmi niepakoicca nakont lekaŭ, jakija pieradajuć z voli — što mohuć da jaho nie dajści. Bo adčuvaje paharšeńnie stanu ŭ suviazi z ankałahičnaj chvarobaj», — kaža Antončyk.
Byłoha staršyniu Partyi BNF i kandydata ŭ prezidenty ŭ vybarach 2010 hoda Ryhora Kastusiova 11 listapada pieraviali ŭ PKT — pamiaškańnie kamiernaha typu, dzie režym utrymańnia niaznačna miakčejšy ad ŠIZA. Pavodle svajakoŭ, spahnańnie dla jaho raściahniecca na 4 miesiacy. Miž tym viadoma, što Ryhoru Kastusiovu pastaŭleny dyjahnaz ankałahična chvoraha. Jakoje lačeńnie akazvajuć jamu ŭ PKT kałonii, viadomaj jak «Voŭčyja Nory», — nieviadoma.
«Pavodle płana, jaki skłali daktary padčas abśledavańnia, u listapadzie-śniežni jamu pavinny rabić analiz kryvi. Ale ci budzie jon, nieviadoma. Vynikaŭ abśledavańnia dahetul nie paviedamlajuć. Jon aryjentujecca na samaadčuvańnie, a jano nie robicca lepšym. Jašče vielmi spadziajecca na miedyčnuju banderol», — paviedamiŭ Źmicier Antončyk.
Pra ŭmovy ŭtrymańnia ŭ PKT, pavodle Źmitra Antončyka, Ryhor Kastusioŭ ničoha nie napisaŭ.
«Prosta napisaŭ, što «pierajechaŭ u inšaje miesca», i bolš pra PKT ničoha. U liście bolš pra toje, jak jon čakaŭ spatkańnia. Jano było zapłanavana siońnia, 29 listapada, užo papiery byli padpisanyja, ale zamiest hetaha jon siadzić ŭ PKT. Vielmi škaduje, što nie ŭbačyŭsia z rodnymi.
Šmat asabistych zvarotaŭ napisaŭ z hetaj pryčyny. Zrazumieły nastroj, kali čałaviek u takim fizyčnym stanie, hetak spadziavaŭsia na sustreču, a jana nie adbyłasia. Na maju dumku, heta taksama ździek», — miarkuje Źmicier Antončyk.
Byłomu staršyniu Partyi BNF Ryhoru Kastusiovu 66 hadoŭ. U vieraśni 2022 hoda sud pryznaŭ Kastusiova vinavatym u «zmovie z metaj zachopu ŭłady» i asudziŭ na 10 hadoŭ źniavoleńnia. Jašče ŭ mienskim SIZA ŭ palitviaźnia dyjahnastavali ankałahičnaje zachvorvańnie.
Apošniaje miedyčnaje abśledavańnie Kastusioŭ prajšoŭ u žniŭni, ale vynikaŭ ahladu i analizaŭ jamu tady nie paviedamili.
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary