Imunitet, achova, zarobak, vyzvaleńnie ad padatkaŭ. Apublikavany pieralik harantyj dla eks-prezidentaŭ Biełarusi
Papraŭki ŭ zakon «Ab Prezidencie Respubliki Biełaruś» Pałata pradstaŭnikoŭ pryniała ŭ pieršym čytańni 7 śniežnia, a ŭ druhim — 22 śniežnia. Inicyjatar zakonaprajekta — Saviet Respubliki. U zakon dadali całkam novy raździeł ab harantyjach dla eks-prezidenta i členaŭ jaho siamji. Dakumient byŭ zrobleny admysłova pad Alaksandra Łukašenku, choć vybary ŭ 2020 hodzie jon, pavodle naziralnikaŭ, prajhraŭ.
Pavodle dakumienta, eks-prezidenta nielha budzie pryciahnuć da adkaznaści za dziejańni, «učynienyja ŭ suviazi z ažyćciaŭleńniem im prezidenckich paŭnamoctvaŭ». Jaho nielha zatrymać, niejak inakš pazbavić asabistaj svabody, padvierhnuć śledčym i inšym pracesualnym dziejańniam.
Takaja ž niedatykalnaść raspaŭsiudžvajecca na členaŭ siamji byłoha prezidenta, na ich žyłyja i słužbovyja pamiaškańni, transpartnyja srodki, srodki suviazi, asabistyja archivy, pierapisku i hetak dalej.
Zdaroŭje
Byłoha kiraŭnika dziaržavy buduć achoŭvać «u poŭnym abjomie mier, praduhledžanych zakanadaŭstvam ab dziaržaŭnaj achovie». Členy siamji taksama atrymlivajuć dziaržachovu «ŭ adpaviednaści z zakanadaŭstvam».
Žyćcio i zdaroŭje byłoha prezidenta padlahajuć abaviazkovamu dziaržaŭnamu strachavańniu za košt srodkaŭ respublikanskaha biudžetu.
Miedabsłuhoŭvańnie, nie tolki eks-prezidenta, ale i jaho siamji, budzie na tym ža ŭzroŭni, što i na dzień spynieńnia paŭnamoctvaŭ pieršaj asoby. Jano pavinna być pažyćciovym.
Finansy
Eks-prezidentu buduć vypłačvać takoje ž hrašovaje ŭtrymańnie, jakoje było ŭ jaho na pasadzie kiraŭnika dziaržavy. Heta harantujecca niezaležna ad taho, ci jość u jaho inšyja krynicy dachodu.
Paśla śmierci byłoha prezidenta kožnamu z čalcoŭ jaho siamji pažyćciova pryznačajecca hrašovaje ŭtrymańnie, taksama niezaležna ad inšych krynic prybytku. Jaho pamier, jak možna zrazumieć z dakumienta, — na ŭzroŭni pryžyćciovaha zarobku prezidenta.
Byłomu prezidentu pieradajecca va ŭłasnaść biaspłatna na vybar dla pastajannaha pražyvańnia nieruchomaja majomaść, jakaja znachodzicca ŭ dziaržaŭnaj ułasnaści ŭ Biełarusi, uklučajučy ziamielny ŭčastak z raźmieščanymi na im kapitalnymi pabudovami, inšaj nieruchomaj majomaściu, u tym liku haspadarčaha pryznačeńnia, a taksama ruchomuju majomaść, źviazanuju z dobraŭparadkavańniem i ekspłuatacyjaj nieruchomaj majomaści, havorycca ŭ dakumiencie.
Byłoha kiraŭnika krainy vyzvalać ad padachodnaha padatku na majomaść, pieradadzienuju ŭ jaho ŭłasnaść.
Status
«Prezident, jaki spyniŭ vykanańnie svaich paŭnamoctvaŭ, maje prava biaspłatna karystacca załami dla aficyjnych asob i delehacyj aeraportaŭ i aeravakzałaŭ, aŭtavakzałaŭ (aŭtastancyj), čyhunačnych vakzałaŭ (stancyj), račnych partoŭ», — adznačajecca ŭ dakumiencie.
Taksama jon maje prava mieć štat pamočnikaŭ, biaspłatna karystacca ŭradavaj i śpiecyjalnaj suviaźziu na terytoryi krainy. Usie jaho listy i telehramy apracoŭvajucca i dastaŭlajucca na ŭzroŭni ŭradavych.
Bolš padrabiazna z dakumientam možna aznajomicca tut.
Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»7
Kamientary