U rasstrele pałonnych ukrainskich bajcoŭ na Zaparožžy padazrajuć pskoŭskich desantnikaŭ
U ofisie hienieralnaha prakurora Ukrainy padazrajuć u rasstrele troch ukrainskich vajennapałonnych vajskoŭcaŭ z 76-j hvardziejskaj desantna-šturmavoj dyvizii, viadomaj jak «Pskoŭskaja desantnaja dyvizija». Pra heta zajaviŭ kiraŭnik departamienta ofisa hienieralnaha prakurora Juryj Biełavusaŭ u efiry «Radyjo Svaboda», piša «UP».
Biełavusaŭ skazaŭ, što imiony zahinułych vajskoŭcaŭ Uzbrojenych Sił Ukrainy viadomyja, ale buduć apublikavanyja paźniej. U prakuratury pakul nie hatovyja kamientavać, dzie ciapier cieły zahinułych vajskoŭcaŭ.
«U ciapierašni čas my možam paćvierdzić sapraŭdnaść videa. Nami byli vyznačanyja našy vajskoŭcy, jakija byli žorstka zabityja. My ciapier vyznačajem datyčnych asob da hetaha złačynstva. My miarkujem, što da hetaha złačynstva maje dačynieńnie 76-ja desantnaja dyvizija Rasijskaj Fiederacyi. Ale hetyja danyja my zaraz praviarajem. Hetaja dyvizija ŭžo viadomaja vajennymi złačynstvami, jakija ździajśnialisia va Ukrainie, u pryvatnaści na Kijeŭščynie«, — skazaŭ jon.
Ofis hienprakurora Ukrainy bačyć sistemnaść u takich pavodzinach rasijskich vajskoŭcaŭ u Zaparožskaj vobłaści.
Sa słoŭ Biełavusava, u hetym ža miesiacy było ŭstanoŭlena vykarystańnie rasijskaj armijaj ukrainskich vajskoŭcaŭ u jakaści žyvoha ščyta.
27 śniežnia ofis hienprakurora paviedamiŭ, što raspačataje rasśledavańnie pavodle fakta rasstrełu rasijskimi vojskami ŭkrainskich vajennapałonnych pad Zaparožžam. Pa danych śledstva, vajskoŭcy RF u śniežni 2023 hoda padčas boju ź siłami abarony Ukrainy pablizu Rabocina Zaparožskaj vobłaści ŭziali ŭ pałon troch ukrainskich abaroncaŭ, a praz hadzinu ich rasstralali.
Videa rasstrełu trapiła ŭ sacsietki.
Raniej u ŚMI trapiła videa ź bieśpiłotnika, na jakim zafiksavana, jak rasijskija vajskoŭcy viaduć pałonnych bajcoŭ USU pad rulami aŭtamataŭ u bok ukrainskich pazicyj, prykryvajučysia imi.
U kastryčniku hetaha hoda ŭpraŭleńnie Viarchoŭnaha kamisara AAN pa pravach čałavieka ŭ svaim dakładzie ab situacyi va Ukrainie, jakaja achoplivała pieryjad ź lutaha pa lipień 2023 hoda, zafiksavała šeść vypadkaŭ pazasudovych pakarańniaŭ śmierciu ŭkrainskich vajennapałonnych.
Zhodna z Ženieŭskaj kanviencyjaj ab abychodžańni z vajennapałonnymi, padpisanaj u pryvatnaści Rasijaj, pałonnym pavinny być harantavanyja žyćcio i humannyja ŭmovy ŭtrymańnia. Pakarańnie abo žorstkaje abychodžańnie z vajennapałonnymi adnosicca da vajennych złačynstvaŭ.
Na vajnie va Ukrainie zahinuŭ były dyrektar dvuch aršanskich zavodaŭ4
Kamientary