«Zrazumieła, kudy chaču inviestavać enierhiju». Stała viadoma, čym ciapier zajmajecca Natalla Chierše
Byłaja palitźniavolenaja biełaruska, hramadzianka Šviejcaryi Natalla Chierše dała intervju prajektu Kyky, u jakim raskazała, čym ciapier, praz amal dva hady paśla vyzvaleńnia, zajmajecca. Akazvajecca, jaje raniejšaje chobi nieŭzabavie maje stać prafiesijaj.
Da źniavoleńnia Natalla Chierše pracavała mieniedžarkaj na kantroli jakaści na pradpryjemstvie ŭ adnym sa šviejcarskich kancernaŭ. Paśla vyzvaleńnia i viartańnia ŭ Šviejcaryju na toj ža pasadzie pracavać nie mieła maralnych siłaŭ, ale ŭładkavałasia ŭ tym ža kancernie na inšuju pasadu. Adnak papracavała tam tolki vosiem miesiacaŭ, a paśla hetuju staŭku nie zaćvierdzili. Zrešty, jana nie nadta rasstroiłasia, bo samoj chaciełasia zaniacca čymści novym.
«Ciapier uvieś volny čas ja addaju malavańniu. Daŭno chacieła pajści ŭ dom sastarełych, kab pisać partrety pastajalcaŭ. Uletku narešcie zrabiła heta — mnie navat adrazu prapanavali zrabić viernisaž. Jaho praviali prosta ŭ domie sastarełych.
Da hetaha rašeńnia ja išła doŭha. Kali abapiracca na rozum, to treba mieć niejkuju pracu z rehularnym dachodam, — praz hetuju ŭstanoŭku ja zaŭsiody i vyznačała svaju budučyniu. Hetym razam vyrašyła: budu zajmacca tym, što prynosić radaść mnie i ludziam», — havoryć Natalla.
Raniej jana malavała ŭ jakaści chobi. Fatahrafavała kaleh pa pracy, pisała ich partrety. Sprabavała praciahvać heta i za kratami, ale tam nie zaŭsiody byli dla hetaha ŭmovy, choć niekalki partretaŭ źniavolenych žančyn napisać i navat pieradać na volu ŭdałosia.
Ciapier ža
«dakładna mahu skazać, što malavańnie — maja budučaja prafiesija. Užo amal hatovy moj sajt, dzie budzie śpis pasłuh, jakija ja prapanuju jak mastak. Možna budzie, naprykład, zakazać partret albo paprasić napisać jaho z natury ŭ režymie realnaha času.
Jašče mahu być karysnaj na sudovych pracesach. U Šviejcaryi ich nielha zdymać abo fatahrafavać, tamu cikavyja dla hramadskaści pracesy vizualizujuć mastaki. Varyjantaŭ šmat — hałoŭnaje, što ja vyznačyłasia i zrazumieła, kudy chaču inviestavać enierhiju».
Nahadajem, što ŭradženka Oršy Natalla Chierše letam 2020 hoda pryjechała sa Šviejcaryi na radzimu i ŭziała ŭdzieł u paślavybarčych pratestach. Za toje, što padčas zatrymańnia pasprabavała sarvać ź siłavika bałakłavu, jaje asudzili na 2,5 hoda źniavoleńnia. Adbyć daviałosia 17 miesiacaŭ, pry hetym uvieś čas za kratami Chierše pavodziła siabie vielmi mužna i pryncypova. Vyzvalić jaje ŭdałosia ŭ lutym 2022 hoda dziakujučy namahańniam šviejcarskich dypłamataŭ.
Natalla Chierše nakont pieramoŭ pra vyzvaleńnie palitviaźniaŭ: Nie dumaju, što hetaja inicyjatyva zychodzić ad samich palitviaźniaŭ
Natalli Chierše ŭručyli premiju «Mužnaść» šviejcarskaha časopisa Beobachter
«Troch maich katoŭ addali nazaŭsiody». Natalla Chierše źbirajecca vykupić adnaho z hadavancaŭ
Natalla Chierše zmahła viarnuć svaju košku
«Pad hałavu časam kłała abutak, bo nie mieła ni paduški, ni matraca». Intervju z Natallaj Chierše — pra kałoniju, muža i niepachisnaść
Chto pieramoh i chto prajhraŭ u spravie vyzvaleńnia Natalli Chierše?
Kamientary