Razmytnienyja pa lhocie aŭto nielha budzie pradavać u Rasiju. Što źmienicca ŭ zakonie i jak heta adabjecca na Biełarusi?
Z 1 krasavika 2024 hoda ŭ krainach Jeŭrazijskaha ekanamičnaha sajuza čakajecca ŭstupleńnie ŭ siłu adzinaj sistemy kiravańnia ryzykami. Paśla jaje zapusku pieraprodaž u Rasiju aŭto, razmytnienych pa ilhotnym taryfie, stanie niemahčymym. «Naša Niva» raźbirałasia, jak novaŭviadzieńni adabjucca na biełaruskim aŭtamabilnym rynku.
Łaziejka prykryjecca
Schiema, pa jakoj aŭtamabili, razmytnienyja z vykarystańniem ilhoty, pierapradajuć u Rasiju biez dadatkovych dapłat, pracuje amal 5 hadoŭ. Ale vyhladaje, što z 1 krasavika «łavačka» prykryjecca.
Aŭtamabili, razmytnienyja pa ŭkazie №140, pakul nie majuć abmiežavańniaŭ pa adčužeńni ŭ inšyja krainy JeŭrAzES, tamu masava asiadajuć u Rasii. Heta dazvalaje sekanomić na mycie ad niekalkich sotniaŭ da dziasiatkaŭ tysiač jeŭra.
Inicyjataram źmien u zakanadaŭstvie, jakija zabaroniać pieraprodaž takich mašyn biez dapłaty roźnicy ŭ pošlinach, stała Rasija, jakaja ŭ adroźnieńnie ad Biełarusi atrymlivała ad hetaha peŭnyja straty.
Čamu Maskva pajšła na taki krok?
Ilhotnyja mašyny išli ŭ Rasiju ad samaha pačatku źjaŭleńnia ŭkaza viasnoj 2019 hoda. Adnak da pačatku poŭnamaštabnaj vajny va Ukrainie ich płyń była nievialikaja i ŭ maštabach Rasii amal niezaŭvažnaja.
Paśla sychodu z Rasii šerahu suśvietnych aŭtavytvorcaŭ płyń mašyn ź Jeŭropy i ZŠA ŭ Rasiju pavialičyłasia ŭ niekalki razoŭ. Niemałaja častka ź ich traplaje praź Biełaruś z apłataj 50% pošliny.
Bolš za 14 tysiač novych aŭto razmytnili praź Biełaruś
Asabliva adčuvalnaja ekanomija atrymlivajecca ŭ vypadku impartu novych aŭto, jakija razmytnivajucca pa staŭcy 48% ad koštu. Tak, na mašynie za 100 tysiač jeŭra ekanomija na mycie składaje 24 tysiačy jeŭra. Zhodna z danymi rasijskaha boku, letaś praź Biełaruś u Rasiju ŭvieźli kala 14 tysiač novych lehkavikoŭ. Kolkaść patrymanych mašyn budzie našmat bolšaja.
Adnak Biełaruś nie adzinaja kraina, praź jakuju ŭ Rasiju traplali lhotnyja mašyny. Lidaram u hetym śpisie źjaŭlajecca Kyrhyzstan. Praz hetuju krainu ŭ Rasiju letaś uvieźli kala 56 tysiač novych aŭto.
Kyrhyzski schiematoz
Kyrhyzskaja schiema adroźnivajecca ad našaj, u joj niama lhotnych taryfaŭ, ale miascovaja mytnia ŭ pramysłovych maštabach afarmlała aŭtamabili pa zanižanych invojsach.
U vypadku z Kyrhyzstanam realny i mytny košt aŭtamabila moh adroźnivacca ŭ 3 razy, što dazvalała ekanomić na mycie jašče bolš, čym u vypadku ź biełaruskim dyskontam u 50%.
Što dobra dla susiedziaŭ — drenna dla Rasii
U Rasii spadziajucca, što sistema kiravańnia ryzykami pavysić prazrystaść impartnych patokaŭ i ŭ pieršuju čarhu pastavak aŭtamabilaŭ. U vypadkach, kali rasijskaja mytnia budzie bačyć, što aŭtamabil razmytnili ŭ Biełarusi z vykarystańniem ilhoty abo ŭ Kyrhyzstanie pa zanižanym košcie, pakupniku daviadziecca dapłacić roźnicu.
Vice-prezident Nacyjanalnaha aŭtamabilnaha sajuza Rasii Anton Šaparyn źviarnuŭ uvahu, što ceły šerah krain žyvie za košt taho, što praź ich pajšli transpartnyja patoki ŭ Rasiju, u tym liku patok aŭtamabilaŭ. U vyniku biznes i biudžety hetych krain atrymlivajuć prybytak, a Rasija — straty.
Sam fakt, što ŭ Rasii zadalisia hetym pytańniem mienavita ciapier, vierahodna, śviedčyć pra toje, što za dva hady pracy ŭ režymie sankcyj aŭtamabilny rynak Rasii prystasavaŭsia da novych umoŭ i bolš nie maje vialikaj patreby ŭ šerym imparcie.
Jak heta adabjecca na Biełarusi?
Niahledziačy na toje, što Biełaruś nie płanuje admianiać ci ŭnosić źmieny va ŭkaz №140, prapanavanyja Rasijaj źmieny adabjucca na našaj krainie. Praŭda, bolšaść šarahovych hramadzian na sabie heta nie adčujuć.
Heta ŭ pieršuju čarhu zakranie tych, chto zajmajecca pieraprodažam aŭto ź Jeŭropy i ZŠA. Taksama mienš pracy stanie i ŭ tych, chto zajmajecca dastaŭkaj aŭto, ich ramontam, pieradprodažnaj padrychtoŭkaj. Niedaatrymlivać budzie i biełaruski biudžet.
Naprykład, aproč mytnaj pošliny, pry ŭvozie aŭto i inšaj techniki ŭ Biełaruś treba apłacić utylizacyjny zbor (ad 545 da 1225 rubloŭ za lehkavoje aŭto). Hetyja hrošy całkam nakiroŭvalisia ŭ biełaruski biudžet.
Pierakupy z Rasii źniknuć
Biełaruskija hulcy aŭtamabilnaha biznesu ličać, što novaŭviadzieńni całkam nie spyniać ich biznes. I reč nie tolki ŭ tym, što ŭ ich zastaniecca miascovy rynak. Jany taksama raźličvajuć na toje, što buduć klijenty z Rasii, hatovyja razmytnivać aŭto adrazu ŭ svajoj krainie.
A voś rasijskija pierakupy, jakija ŭžo hadami pryjazdžali ŭ Biełaruś pa śviežapryhnanyja mašyny, vidać, chutka źniknuć jak kłas.
Čytajcie taksama:
Kaniec historyi. Traktary na MTZ pierastanuć farbavać u sini koler
«Z momantu kupli prajšło 1,5 tydnia, a tut takoje!» Biełarus kupiŭ BELGEE X50 i adrazu znajšoŭ prablemy
U Biełaruś pryvieźli na prodaž redkuju Geely za 13 000 dalaraŭ. Voś jak jana vyhladaje
Kamientary