Rasijski traŭler «Kapitan Łabanaŭ» u Bałtyjskim mory padbiła rasijskaja rakieta
U vyniku traplańnia rakiety ŭ rybałoŭny traŭler «Kapitan Łabanaŭ» 19 sakavika zahinuli try členy ekipaža, jašče čaćviora atrymali ranieńni. Pra heta telekanału «Dožd́» raskazaŭ svajak adnaho z členaŭ ekipaža. Pry hetym krynica paviedamiła, što rakietu, jakaja trapiła ŭ traŭler, nibyta vypuścili padčas vučeńniaŭ Bałtyjskaha fłotu.
Pierad incydentam členy ekipaža traŭlera źbiralisia lehčy spać, a rakieta ŭpała na rubku kapitana.
Pavodle aficyjnych paviedamleńniaŭ miascovych uładaŭ, na borcie traŭlera adbyŭsia pažar, a pryčyny incydentu pakul nieviadomyja. Akramia taho, ułady paviedamlajuć tolki pra adnaho zahinułaha.
«Kali zabirali tych, chto vyžyŭ, usie vydatna viedali, što zahinuli try čałavieki. I ŭsie vydatna viedali, što ŭdaryła rakieta. Ale jany vyrašyli napisać, što adbyłosia «ŭzharańnie». Cikava, jakoje heta ŭzharańnie, kali kapitanskaj rubki całkam niama, jaje prosta źniesła», — havoryć krynica «Doždia».
Tych členaŭ ekipaža, jakija vyžyli, adpravili ŭ špital u horadzie Pijaniersk, adzin z paciarpiełych znachodzicca ŭ ciažkim stanie. Pa słovach krynicy, u špitali paciarpiełych dapytali supracoŭniki FSB, jakija paprasili členaŭ ekipaža «nie raspaŭsiudžvacca» pra incydent.
Jašče adna rakieta, sa słoŭ krynicy, upała ŭ rybałoŭnyja sietki pobač z pramysłovym sudnam kampanii MRTK, jakoje znachodziłasia niepadalok ad traŭlera «Kapitan Łabanaŭ».
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary
Komandir: - Mnie...KAP-3 dali...naviernoje popali kuda-to..