Akcyi da Dnia Voli ŭ dyjasparach u roznych haradach i krainach pačalisia na hetyja vychadnyja.
U Varšavie prajšli mitynh i šeście z nacyjanalnymi ściahami, udzieł u jakich pryniali biełaruskija aktyvisty i hramadskija dziejačy, palityki, pradstaŭniki biełaruskich inicyjatyŭ i biełarusy Varšavy.
«Nacyjanalnaja śviadomaść — heta naša zbroja i naš ščyt. Heta toje, dziakujučy čamu my, biełarusy, zachavalisia jak nacyja, niahledziačy na stahodździ rasijska-impierskaj i rasijska-savieckaj akupacyi. Niahledziačy na hvałtoŭnuju rusifikacyju, niahledziačy na teror, niahledziačy ni na što», — adznačyŭ Pavieł Łatuška padčas udziełu ŭ śviatočnych mierapryjemstvach u Varšavie.
Pavieł Łatuška taksama padziakavaŭ tym, chto adstojvaje niezaležnaść: «Dziakuju ŭsim biełarusam i biełaruskam, dzie b vy nie byli siońnia, za toje, što vy nie zdalisia, nie skarylisia i praciahvajecie baraćbu. Kožny — na svaim miescy i ŭ mieru svaich mahčymaściaŭ».
U Biełastoku mitynh-kancert prajšoŭ na hałoŭnym placy horada — Rynku Kaściuški. La ratušy sabralisia blizu 200 čałaviek. Z Dniom Voli biełarusaŭ vinšavaŭ namieśnik prezidenta Biełastoka Rafał Rudnicki. Jon kazaŭ pra ščaśliviejšuju budučyniu Biełarusi, kali jana stanie dobrym Polščy susiedam, pryznavanym mižnarodnaj supolnaściu demakratyčnym krajem.
Dziajač biełaruskaha ruchu ŭ Polščy Jaŭhien Vapa nazvaŭ BNR krainaju mary. Jon skazaŭ, što nielha spapialić narod, jaki jość.
«Duch svabodnaj Biełarusi, svabodnaha narodu ŭ sercach usich biełarusaŭ. Biełaruski duch dazvolić nam siońnia pieratryvać hetuju navału, jakuju choča łukašyzm i pucinizm… BNR — załoh taho, što my budziem u volnaj demakratyčnaj Biełarusi tady, kali dazvolać hieapalityčnyja ŭmovy i zachočam my», — pramaŭlaŭ Vapa.
Na mitynhu vystupili taksama inšyja pradstaŭniki biełaruskaj dyjaspary. Pavinšavaŭ biełarusaŭ i pradstaŭnik ukrainskaj dyjaspary.
Viała mitynh śpiavačka i falkłarystka Kaciaryna Vadanosava. Pa skančeńni mitynhu adbyŭsia kancert. Na placy było šmat bieł-čyrvona-biełych ściahoŭ i inšaj nacyjanalnaj atrybutyki. Była raściažka, pryśviečanaja palitviaźniam. Pra ich taksama pramaŭlali vystupoŭcy. Havaryli pra źniavolenych tvorcaŭ i palitykaŭ. Nieadnarazova hučaŭ voklič «Žyvie Biełaruś». Zhadvalisia i cichary, jakija mahli znachodzicca ŭ hramadzie ŭdzielnikaŭ i ŭpojtaj fatahrafavaać ich.
A tak vyhladała śviatkavańnie ŭ Hdańsku.
Akcyja biełarusaŭ da Dnia Voli prajšła taksama ŭ polskaj Łodzi.
Tak vyhladaŭ mitynh u Prazie.
Ciapier čytajuć
Staŭ hierojem Mahiloŭskaha ŭniviera, źbiraŭ falkłor, pracavaŭ na biełarusizacyju sadkoŭ — raskazvajem pra Jaŭhiena Bojku, asudžanaha za salidarnaść z palitviaźniami
Kamientary