Kadebešniki sprabujuć vierbavać biełarusaŭ-emihrantaŭ praź ich baćkoŭ — što viadoma?
Jak stała viadoma «Našaj Nivie», kadebešniki aktyŭna zavitvajuć da baćkoŭ biełarusaŭ-emihrantaŭ, prapanoŭvajučy papoŭnić šerahi ich ahientaŭ. Pra heta nam paviedamiła adrazu niekalki krynic.
My nie ŭkazvajem danyja surazmoŭcaŭ u metach biaśpieki.
U adnym z kiejsaŭ supracoŭniki KDB pryjšli dadomu da maci dziaŭčyny, jakaja źjechała Biełarusi ŭ 2020 hodzie. Viadoma, što jana ŭklučanaja ŭ tak zvanuju bazu «Biesparadki» za ŭdzieł u akcyjach pratestu.
«Spačatku zabrali maci da siabie, prahladali ŭsie jaje sacsietki i listavańnie ŭ miesiendžarach. Raspytvali pra mianie, čym žyvu, z kim kamunikuju. Prapanavali «paŭpłyvać» na mianie, patłumačyŭšy, što jany mnie nie vorahi i ja mahu pryjechać dadomu, maŭlaŭ, za biaśpieku možna nie pieražyvać, — raskazvaje dziaŭčyna. — Potym jany ŭziali ŭ maci maje kantakty i zvanili napramuju: znoŭ davodzili, što bajacca niama čaho, što ja mahu pryjechać i pracavać u Biełarusi, nibyta mnie i z pracaj dapamohuć (za miažoj ža ŭ mianie ŭsio drenna, na ich pohlad)».
Ale ŭsio heta, jak vyśvietliłasia ŭ kancy razmovy, nie prosta tak — za mahčymaść viarnucca na radzimu ci jeździć tudy-nazad «biez prablem na miažy» treba budzie źlivać infarmacyju pra biełaruskuju dyjasparu, pra aktyvistaŭ, jakija nie śvieciacca, ale niejkim čynam prajaŭlajuć siabie za miažoj.
«Ja, kaniečnie, admoviłasia, patłumačyŭšy, što dadomu ŭsio adno nie źbirajusia — i heta praŭda. Ale jany, vidać, šukali ŭ nastalhii pa radzimie słabaje miesca. Zhadali zaadno, što voś, mahčyma, ž u mianie niechta niekali pamre, i tady ja pieradumać mahu, zachaču mohiłki naviedać», — praciahvaje dziaŭčyna.
Da baćki jašče adnaho biełarusa pryjšli z padobnaj metaj. Chłopiec žyvie za miažoj užo niekalki hod, i taksama ŭdzielničaŭ u pratestach.
Kadebešniki kazali baćku, što praciahvajuć sačyć za sacyjalnymi sietkami cikavych im ludziej, analizujuć.
«U taty pytalisia, ci nie chaču ja na ich papracavać, kab jeździć u Biełaruś. Ën daŭ zrazumieć, što heta — pustoje, ale jamu daviali, kab jon usio ž parazmaŭlaŭ sa mnoj», — kaža chłopiec.
Jašče adzin surazmoŭca adznačaje, što daŭno zrabiŭ sacyjalnyja sietki zakrytymi i pačyściŭ padpisantaŭ, ale kadebešniki, jakija pryjšli da jaho maci, nibyta pakazvali śviežyja storys i dopisy adtul.
«Takoje adčuvańnie, što niechta z maich padpisantaŭ ź Biełarusi ź imi ci supracoŭničaje, ci ŭ ich prosta niekali praviarali telefon, i ŭ moj profil zajšli adtul».
Akramia prapanovy spakojna jeździć u Biełaruś u abmien na supracoŭnictva, jakuju maci paprasili pieradać, u jaje pytalisia pra cikaŭnaść syna da pałka Kalinoŭskaha.
«U mianie nijakich dumak vajavać nie było, ja daŭno žyvu svaim žyćciom, u mianie siamja. Ale heta ich, vidać, vielmi chvaluje. Šukajuć taho, chto moža niejkuju infu pra połk źlivać», — raskazvaje chłopiec.
Čytajcie taksama:
«Čekist», vieteran ci špijon HUR? Mahčyma, u Polščy vykryli jašče adnaho ahienta biełaruskaha KDB
KDB vyrabiła pašpart «Novaj Biełarusi» dla eks-načalnika śledčaha ŭpraŭleńnia Mahilova
Ciapier čytajuć
«Stajać na svaim, kožny nakolki moža!» Vialikaja hutarka z Natallaj Dulinaj pra hopnikaŭ z HUBAZiKa, Kaleśnikavu i što tam u kaho ŭ kałonii13
Kamientary