Navukoŭcy znajšli na Miesiacy piačoru. Jany spadziajucca, što ŭ joj kali-niebudź pasielacca astranaŭty

Navukoŭcy ŭpieršyniu vyjavili na Miesiacy piačoru, jakaja tearetyčna moža być idealnym miescam dla ŭładkavańnia zasielenaj bazy na spadarožniku Ziamli, piša Bi-bi-si.

Hłybinia piačory, znojdzienaj italjanskimi navukoŭcami pry dapamozie radara, składaje minimum 100 mietraŭ. Adnak daśledčyki miarkujuć, što jana źjaŭlajecca tolki adnoj z sotniaŭ takich piačor, jakija chavajucca ŭ «jašče nie vyvučanym padziemnym śviecie» miesiaca.

Navukoŭcy Łarenca Bruconie i Leanarda Karer z Univiersiteta Trenta ŭ Italii vyjavili piačoru, vyvučajučy zdymki dobra viadomaha miesiacovaha rajona pad nazvaj Mora spakoju.

Heta Miesiacovaje mora možna ŭbačyć ź Ziamli niaŭzbrojenym vokam, i mienavita tam u 1969 hodzie ažyćciavili pieršuju ŭ historyi pasadku amierykanskija astranaŭty misii «Apałon-11».

Uvachod u piačoru znachodzicca na miesiacovaj pavierchni, a pad im raźmiaščajucca viertykalnyja ścieny.

Pavialičyć

Navukoŭcy miarkujuć, što piačora ŭźnikła miljony ci navat miljardy hadoŭ tamu, kali na Miesiacy pierasoŭvałasia raspalenaja łava — mienavita jana mahła prarabić u kamianiach taki tunel.

Najbližejšym padobnym fienomienam na Ziamli navukoŭcy nazyvajuć vułkaničnyja piačory na ispanskaj vyśpie Łansarote, kaža prafiesar Karer. Jon dadaje, što italjanskija navukoŭcy naviedvali hety vostraŭ padčas svaich daśledavańniaŭ.

Navukoŭcy zapadozryli, što na Miesiacy jość piačory, jašče kala 50 hadoŭ tamu. Ale tolki ŭ 2010 hodzie amierykanskaje kaśmičnaje ahienctva NASA adpraviła na Miesiacovuju arbitu aparat pad nazvaj Lunar Reconnaissance Orbiter, jaki pry dapamozie radaraŭ vyvučyŭ miescy, dzie mahli znachodzicca ŭvachody ŭ piačory.

U vyniku analizu atrymanych malunkaŭ i było zroblena ciapierašniaje adkryćcio.

«Heta dziŭna. Kali robiš takija adkryćci, to hladziš na atrymanyja zdymki i razumieješ, što ty pieršy čałaviek u historyi čałaviectva, jaki heta bačyć», — raspaviadaje Karer.

Jon dadaje, što aŭtary daśledavańnia adrazu zrazumieli, što Miesiacovaja piačora moža być dobrym miescam dla bazy astranaŭtaŭ. «Urešcie žyćcio na Ziamli pačynałasia mienavita ŭ piačorach, tak što ludzi mahli b pasialicca ŭ ich i na Miesiacy», — zaŭvažaje Karer.

Adkrytuju imi piačoru jašče treba budzie vyvučyć — i dla hetaha navukoŭcy spadziajucca vykarystoŭvać radary, kamiery abo navat robataŭ. Pakul im nie viadomaja ni dakładnaja hłybinia hetaj piačory, ni dakładny miechanizm ich uźniknieńnia.

• 8
• 0
• 0
• 0
• 0
• 0
• 0
• 0