Hetym letam źbirajucca zapuścić ciahniki sa Smalenska ŭ Viciebskuju vobłaść
U pačatku leta startavali ciahniki z Pskoŭskoj vobłaści.
Pryhraničnaje pryharadnaje złučeńnie zapuściać pamiž Smalenskam i Viciebskaj vobłaściu hetym letam, paviedamiŭ namieśnik načalnika pasažyrskaj słužby — načalnik adździeła arhanizacyi pasažyrskich pieravozak Biełčyhunki Siarhiej Šemiet padčas pres-kanfierencyi, piša «Sputnik».
Jon nahadaŭ, što z 5 červienia BČ razam z Rasijskaj čyhunkaj arhanizavali pasažyrskaje złučeńnie pamiž Pskoŭskaj vobłaściu i Biełaruśsiu.
Ciahniki kursujuć pa maršrutach Vialikija Łuki (Pskoŭskaja vobłaść) — Alešča (Viciebskaja vobłaść) i Navasakolniki (Pskoŭskaja vobłaść) — Alešča.
Šemiet padkreśliŭ, što kirunak nabiraje papularnaść, choć popyt nie vielmi vialiki.
«U zaviaršalnaj stadyi realizacyi znachodzicca ŭ nas kirunak: Smalensk — Asinaŭka (da Oršy) i Smalensk — Zaolša (kirunak da Viciebska). Našy rehijanalnyja ciahniki ekanom-kłasa buduć jechać da Asinaŭki i pierasadžvacca buduć ad Asinaŭki da Smalenska. Uletku hetaha hoda prajekt budzie realizavany», — skazaŭ jon.
Kamientary