Ryžyčenka: Zarobak 2500 dałaraŭ u Biełarusi praź dziesiać hadoŭ — heta absalutna realistyčnyja ličby
Pradstaŭnica Abjadnanaha pierachodnaha kabinieta Biełarusi pa ekanamičnych reformach Alisa Ryžyčenka raspaviała na «Biełsacie» pra svaju doŭhaterminovuju Stratehiju ekanamičnaha raźvićcia demakratyčnaj Biełarusi da 2035 hoda, paviedamlaje APK.
«Stratehija — heta nie pakiet ekanamičnych reformaŭ, heta napramak i tyja haliny haspadarki, jakija patrabujuć transfarmacyi. Jana baziravałasia na tym, što Biełaruś moža raźvivacca tolki ŭ vypadku, kali heta budzie ekanomika viedaŭ, jakaja bazirujecca na adukacyi, navucy i technałohijach. I jakraz tyja ličby i klučavyja pakazčyki, jakija byli ahučanyja, heta jak mety, kudy treba imknucca».
«Heta pakul što na siońniašni dzień adziny dakumient i kancepcyja, jakaja apisvaje ŭ cełym i achoplivaje bolš halinaŭ haspadarki, čym tolki ŭ vuzkim značeńni ekanamičnyja reformy. I mnie zdajecca, heta adziny pravilny padychod, jaki zabiaśpiečyć ŭstojlivy rost biełaruskaj ekanomiki».
«Hałoŭnaje adroźnieńnie hetaj stratehii ŭ tym, što jakraz tyja resursy, jakija vyzvalajucca, dziakujučy pastupovym reformam, jany i mohuć być nakiravanyja na reformu adukacyi, reformu navuki, dla raźvićcia technałohij, inviestycyjaŭ».
«My, na žal, jak i biełaruskaje hramadstva, pryzvyčailisia dumać u ramkach ekanomik minułaha stahodździa, jakija bazirujucca vyklučna na vytvorčaści, apracoŭcy jakich-niebudź resursaŭ, jakija vykopvajucca ź ziamli, na apracoŭcy nafty. Ale my zaraz havorym pra poŭnaściu inšuju ekanomiku, pra ekanomiku, jakaja vybudoŭvajecca na vysokich technałohijach. I tut całkam inšaja dadadzienaja vartaść i całkam inšyja sumy, jakija buduć hienieryravacca ŭ takoj ekanomicy».
Pradstaŭnica APK, adkazvajučy na pytańnie viadučaha, padkreśliła, što zarobak u 2500 dalaraŭ praz umoŭnyja dziesiać hadoŭ — «heta absalutna realistyčnyja ličby»: «Jość unutranyja resursy ŭ biełaruskaj ekanomicy. U tym liku, naprykład, u sistemie adukacyi, jakija možna pieranakiroŭvać na toje, kab pavialičvać zarpłaty nastaŭnikam».
«Kali b biełaruskija ŭłady chacieli heta realizavać, jany b heta ŭžo daŭno zrabili. Ale tuta prablema ŭ inšym: jany nie zacikaŭlenyja ŭ hetym, bo takaja sistema, jakaja praduhledžanaja ŭ stratehii, vyklučyć karupcyjnyja schiemy ŭ cełym. Usio adbyvajecca ŭ elektronnym farmacie praz prazrystyja miechanizmy, dzie hramadzianie bačać umoŭna, za kolki kuplajecca kamputar u kožnuju škołu, kolki hrošaj vydatkoŭvajecca na niejkija navukovyja daśledavańni i jaki idzie z hetaha vynik.
Ułady ŭ takoj sistemie nie zacikaŭlenyja, tamu što jany nabivajuć svaje kišeni za dziaržaŭnyja resursy. Tamu jany nie mohuć i nie buduć realizoŭvać hetuju stratehiju. Ale kali jany voźmuć asobnyja idei i paśpiachova ich realizujuć, što palepšyć jakaść žyćcia biełarusaŭ, ja budu tolki rada», — skazała jana.
Ciapier čytajuć
Bližejšym časam buduć vyzvaleny bolš za 150 palitźniavolenych24
Kamientary
A tyja što ŭ roznych pracesach i stadyjach, to nie.