U Lelčyckim rajonie znajšli krynicu ŭltrapresnaj minieralnaj vady, i tamu miascovyja ŭłady nacelilisia stvaryć vytvorčaść pa jaje raźlivie, pišuć «Mocnyja naviny».
Miascovyja ŭłady padrychtavali inviestprajekt «Stvareńnie pradpryjemstva pa zdabyčy i raźlivie pryrodnaj naturalnaj ultrapresnaj i dziciačaj pitnoj vady vyšejšaj katehoryi».
U Nacyjanalnym ahienctvie inviestycyj i pryvatyzacyi adznačajuć, što na biełaruskim Paleśsi vyjavili admietnyja pa svaim składzie ŭltrapresnyja padziemnyja vody ź minieralizacyjaj ad 15 da 20 milihramaŭ na litr.
«Jak pa minieralizacyi, tak i pa źmieście asnoŭnych kampanientaŭ chimičnaha składu vody ŭ rajonie vioski Dubroŭki Lelčyckaha rajona Homielskaj vobłaści anałahičnyja ŭltrapresnym vodam viadomych marak jeŭrapiejskich krain. Takich, jak Spa (Bielhija), Evian i Perrier (Francyja), Voss (Narviehija), Celtic (Hiermanija), Levissima (Italija) i inšych», — havorycca ŭ prezientacyi prajekta.
Placoŭka, na jakoj chočuć stvaryć vytvorčaść, znachodzicca bolš čym za kiłamietr ad Dubroŭki, jakaja adnosicca da zony radyjeaktyŭnaha zabrudžvańnia. Aŭtary prajekta miarkujuć, što nieabchodna inviestavać u spravu kala 600 tysiač dalaraŭ, a akupicca ŭsio heta prykładna ŭ 3,5 hoda.
Akramia taho, u Lelčyckim rajonie chočuć pabudavać lačebna-turystyčny kompleks na asnovie krynicy ŭltraprasnych padziemnych vod. U prajekcie havorka idzie pra numarny fond na dźvieście miescaŭ.
Zapłanavanyja vydatki — kala 10 miljonaŭ dalaraŭ. Inviestycyi źbirajucca adbić za košt pramoha zboru płaty z naviedvalnikaŭ kompleksu.
Hetaja zaduma ŭźnikła ŭ Lelčycach jak adkaz na dadzienaje letam 2022 hoda daručeńnie Łukašenki pačać realizacyju inicyjatyvy «Adzin rajon — adzin prajekt». Pavodle jaje, u kožnym rajonie miascovyja viertykalščyki pavinny prydumać choć by adzin inavacyjny prajekt, jaki jany mohuć realizoŭvać na miascovaj hlebie.
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami21
Kamientary