Karaleŭskuju siadzibu Paniatoŭskaha ŭ Hrodnie pradajuć tańniej za staruju adnapakajoŭku
Canu na byłuju karaleŭskuju rezidencyju Paniatoŭskich u Paniamuni znoŭ źnizili. Pradać pałac nijak nie atrymlivajecca, piša Hrodna.life.
Były pałac apošniaha karala polskaha i vialikaha kniazia litoŭskaha Stanisłava Aŭhusta Paniatoŭskaha ŭ Paniamuni znoŭ vystavili na prodaž. Canu čarhovy raz źnizili — ciapier da 70,2 tys.rub. (21 tys. dalaraŭ) biez PDV. Za takuju sumu ŭ Hrodnie ciapier składana znajści navat staruju adnapakajovuju kvateru.
Budynak raźmieščany pa adrasie: Prahułačnaja, 15/1. Ahulnaja płošča — 271,2 kv. m. da byłoj rezidencyi prylahaje ziamielny ŭčastak płoščaj 0,1054 ha.
Pakupniku, chutčej za ŭsio, pryjdziecca zapłacić PDV u pamiery 20%. U takim vypadku košt składzie 84 tysiačy 240 rubloŭ. Aŭkcyjon adbudziecca 12 listapada. Budynak aficyjna pryznačany dla praviadzieńnia śpiecyjalizavanych kulturna-aśvietnickich mierapryjemstvaŭ i vidoviščaŭ. Jaho pryznačeńnie nie źmianiłasia z časoŭ kłuba, jaki znachodziŭsia ŭ pałacy ŭ saviecki čas. Budynak naležyć TAA «Hrodnapramtechnika».
Byłaja siadziba pryznana nieruchomaj historyka-kulturnaj kaštoŭnaściu. Pakupnik pavinien padpisać achoŭnaje abaviazacielstva na praciahu miesiaca paśla prodažu. Kali jon nie vykanaje ŭmoŭ aŭkcyjonu, dziaržava zmoža kanfiskavać majomaść.
Siadziba ŭ Paniamuni była pabudavana ŭ 1771 hodzie ŭ styli poźniaha baroka italjanskim architektaram Džuzepe Saka. Tut raźmiaščałasia rezidencyja apošniaha manarcha Rečy Paspalitaj Stanisłava Aŭhusta Paniatoŭskaha, a paźniej siadziby šlachieckich rodaŭ.
Budynak byŭ cahlanym, atynkavanym, z čatyrochkałonnym porcikam na vysokim cokali. Bolšaja častka aryhinalnaha budynka stračanaja. Na aŭkcyjon vystaŭlena častka ź nievialikim frahmientam aryhinalnych ścien. Da jaje prybudavany dvuchpaviarchovy draŭlany korpus z adrasam Prahułačnaja, 15. U hetym korpusie znachodziacca žyłyja kvatery.
Byłuju rezidencyju ŭ Paniamuni pačali pradavać viasnoj 2023 hoda z pačatkovym koštam 374 tys.rub. zatym košt pastupova źnižali. U vieraśni 2024 hoda cana ŭpała ŭdvaja i skłała 175,5 tys.rub. ciapier canu źnizili jašče raz.
Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada8
Kamientary