Śpiavak Saša Nema, jakoha paŭhoda tamu dapytvali ŭ HUBAZiKu, zapisaŭ pieśniu «Nado, batia!»
«Ja nieposłušnyj syn u svojeho otca, nie trus i nie hieroj, a prosto muzykant», — śpiavaje Nema.
U červieni 2024 hoda nieaficyjny kanał HUBAZiKa apublikavaŭ videa sa śpievakom. Tady siłaviki zajavili, što Saša Nema pryjšoŭ u milicyju, kab «vybačycca za svaje dziejańni ŭ 2020 hodzie». U storyz u instahramie sam śpiavak kazaŭ, što «heta była ciažkaja hutarka, z pakazańniami» i jon vycisnuty «ŭ chłam». Śpiavak adznačaŭ, što jaho dziejańni ŭ 2020-m mocna adbiłasia na karjery.
Ci zavodziłasia tady niejkaja sprava ŭ adnosinach da artysta, nie paviedamlałasia. Śpiavak byŭ na voli.
Ciapier Saša Niema vykłaŭ u instahramie pieśniu «Nado, batia!». Jon kaža, što rašyŭ dałučycca da dziaržaŭnaha fłešmobu, dzie ludzi prosiać Łukašenku iści na novy termin u prezidenty.
«Siabry, dziakuj usim, chto padtrymlivaje mianie, asabliva apošnim časam! Ja ščyra ŭpeŭnieny, što my ŭsie zasłuhoŭvajem žyć u krainie, jakuju budavali doŭhija hady! U nas va ŭsich było dastatkova času, kab zrabić pravilnyja vysnovy i pryniać pravilnyja rašeńni! Bieražycie mir, luboŭ i spakoj!» — napisaŭ śpiavak.
Paśla 2020 hoda mnohija artysty ŭ Biełarusi, chto vykazvaŭsia suprać hvałtu, vystupaŭ za sumlennyja vybary ci suprać vajny, trapili ŭ čornyja śpisy. Im nie dazvalajuć vystupać u krainie, ich pieśni nie kruciać pa radyjo i navat nie dajuć śpiavać u karaokie. Niekatoryja prajšli praz zatrymańni. Navat tych, chto nie byŭ aktyŭnymi ŭ 2020-m, ckujuć praŭładnyja aktyvisty i prapahandysty, patrabujučy zabaranić im vystupać jak niedastatkova addanym.
Z apošnich prykładaŭ — Maks Korž, jakomu staŭ pahražać HUBAZiK.
Faktyčna adziny sposab praciahvać artystam vystupać — vykazvać padtrymku dziejnaj uładzie.
Ciapier čytajuć
Bližejšym časam buduć vyzvaleny bolš za 150 palitźniavolenych29
Kamientary