«Kali adsutničaje skład niejkaha pravaparušeńnia, to heta — pastanoŭka na ŭlik». Prakuror raspavioŭ, jak siłaviki sočać za dziećmi
Prakuror Homielskaha rajona Alaksandr Šynkaroŭ abmierkavaŭ z prapahandystami homielskaha dziaržTV «niebiaśpiečnyja zachapleńni» padletkaŭ i sposaby kantrolu za imi, piša «Fłahštok».
Adnosna kvadrobieraŭ prakuror niečakana zajaviŭ, što «na terytoryi Biełarusi vypadkaŭ kvadrobinhu nie adznačana». Ale heta nie nahoda supakojvacca, kaža Šynkaroŭ.
Jon upeŭnieny, što ŭsie baćki pavinny mieć dostup da mabilnaha telefona padletka, adznačyŭšy, što dystancyjnym kantrolem zajmajucca i siłaviki, i čynoŭniki.
«Nie tolki my jak prakurory, ale i supracoŭniki pravaachoŭnych orhanaŭ, inśpiekcyj, kamisij pa spravach niepaŭnaletnich adsočvajuć na stałaj asnovie roliki ŭ TikTok. Pryčym, padletki nie razumiejuć, što kali videa nabrała značnuju kolkaść prahladaŭ, značyć, rana ci pozna pahladzim jaho i my».
Prakuror pryvioŭ u prykład vypadak miesiačnaj daŭniny, kali dzieci biehali pa dachach kramy i zdymali heta na videa. Padletkaŭ ustanavili, razhladajecca pytańnie ab pryciahnieńni ich da adkaznaści.
«Kali adsutničaje skład niejkaha pravaparušeńnia, to heta, biezumoŭna, pastanoŭka na ŭlik, praviadzieńnie prafiłaktyčnaj raboty ź dziciem i baćkami», — zajaviŭ prakuror.
«Maładziožny ekstremizm» — samaja strašnaja tema, ličyć prakuror. Jon kaža, što nieabchodna supraćpastavić sprobam «naviazać čužyja kaštoŭnaści» padletkam «histaryčnuju pamiać»: heta pamiać «ab achviarach mirnaha nasielnictva», «ab vialikim podźvihu savieckaha naroda».
Šynkaroŭ papiaredziŭ, što za łajki i reposty staronak, abvieščanych «ekstremisckimi», padletkaŭ mohuć pakarać navat pa kryminalnych artykułach. I zaklikaŭ baćkoŭ «u pieryjad elektaralnaj kampanii» sačyć za svaimi dziećmi: jak jany baviać čas pa-za domam, što robiać u sacsietkach.
Kamientary