Prezident samaabvieščanaj Respubliki Abchazija Asłan Bžanija padaŭ u adstaŭku. Pasadu pakinuŭ i premjer-ministr Alaksandr Ankvab, paviedamlaje «Echo Kavkaza».
«Z metaj zachavańnia stabilnaści i kanstytucyjnaha paradku ŭ krainie, u adpaviednaści z artykułam 65 Kanstytucyi Respubliki Abchazija, ja padaju ŭ adstaŭku z pasady prezidenta Respubliki Abchazija», — havorycca ŭ dakumiencie, padpisanym Bžanija paśla šmathadzinnych pieramovaŭ uładaŭ i apazicyi.
Zhodna z damoŭlenaściu, padpisanaj bakami, Bžanija padaje zajavu ab adstaŭcy, a hramadzianie, jakija sabralisia na terytoryi i ŭ kompleksie ŭradaŭ, razychodziacca 19 listapada: «U vypadku nievykanańnia hetaha punkta prezident Respubliki Abchazija Bžanija A.H. adklikaje zajavu ab adstaŭcy».
U aŭtorak abchazski parłamient (Narodny schod razhledzić zajavu ab adstaŭcy Bžanija. Vykanaŭcam abaviazkaŭ prezidenta budzie vice-prezident Badra Hunba. Na pasadu premjer-ministra pryznačany Valeryj Bhanba — były śpikier parłamienta.
«Dziejnyja ministry vykonvajuć abaviazki da ŭstupleńnia ŭ pasadu novaabranaha prezidenta Respubliki Abchazija», — adznačajecca ŭ dakumiencie.
Raniej Bžanija zajaviŭ, što płanuje ŭziać udzieł u prezidenckich vybarach.
U adstaŭku Bžanija prymusiła syści apazicyja — 15 listapada ŭ Suchumi pratestoŭcy, jakija vystupali suprać rasijska-abchazskaha «inviestycyjnaha pahadnieńnia», źnieśli častku płota vakoł kompleksu budynkaŭ urada i pranikli na terytoryju, jakaja prylahaje da budynka parłamienta, a zatym i ŭnutr parłamienta i administracyi prezidenta.
Na fonie pratestu parłamient admianiŭ siesiju, na jakoj pavinna było prajści hałasavańnie pa pytańni ratyfikacyi inviestycyjnaha pahadnieńnia z Maskvoj, a ŭ administracyi prezidenta abiacali jaho adklikać.
Abchazskija prezidenty dvojčy sychodzili ŭ adstaŭku daterminova z-za pratestaŭ apazicyi.
1 červienia 2014 hoda syšoŭ z pasady Alaksandr Ankvab. Kanflikt tady byŭ spravakavany vydačaj abchazskich pašpartoŭ žycharam hruzinskaj nacyjanalnaści va ŭschodnich rajonach respubliki.
12 studzienia 2020 hoda ŭ adstaŭku syšoŭ Raul Chadžymba — paśla taho, jak abchazski Viarchoŭny sud admianiŭ vyniki prezidenckich vybaraŭ 2019 hoda. Tady Asłan Bžanija nie zmoh pryniać udzieł u prezidenckich vybarach z-za stanu zdaroŭja (jon i jaho prychilniki ličać, što Bžanija byŭ atručany). Adnak na vybarach u sakaviku 2020 hoda jon vyjhraŭ, nabraŭšy 56,50% hałasoŭ. Jaho supiernikam byŭ Adhur Ardzinba, jaki atrymaŭ 35,42% hałasoŭ.
U Tajłandzie źnikła anlifanščyca ź Pinska. Jaje mahli pradać u Mjanmu5
Kamientary