Čałaviek hoda pa viersii «Našaj Nivy» — Andrej Pačobut. Simvał adzinstva, macniejšaha za łukašyzm

2024 hod — čas cichich biełaruskich hierojaŭ. Machavik represij raskruciŭsia z takoj šalonaj siłaj, što nie daje mahčymaści nikomu ŭstać z akopu. Jak tolki pryŭźniaŭsia i ahučyŭ pazicyju — choć užyvuju, choć u internecie, — ty mišeń dla łukašysckich zhrajaŭ.

I navat u takich abstavinach tysiačy-miljony biełarusaŭ robiać, stvarajuć, ažyŭlajuć krainu. Kožny ź ich robić što moža ŭ časam niemahčymych umovach. Chtości papraŭlaje idyjockija haspadarčyja rašeńni, chtości nastojvaje na humaniźmie, chtości praciahvaje ruku dapamohi susiedu. Chtości zapisvaje biełaruskamoŭnyja tyktoki, chtości raskazvaje praŭdzivuju historyju krainy, chtości lečyć, chtości vučyć.

I pry hetym davodzicca być hatovym, što niejki danosčyk, intryhan, čarnasocieniec złamaje tabie žyćcio. Prosta tamu što taki čas i tamu što jamu dali admašku: «Možna, navalvajsia sa śpiny!»

My zachoplena nazirajem za fantastyčnymi ŭčynkami ludziej u Biełarusi. I doŭha vahalisia, a ci možam my nazyvać Čałaviekam hoda kahości ź biełarusaŭ, jakija znachodziacca ŭnutry Biełarusi na svabodzie? I pryjšli da vysnovy, što nie možam. Bo nielha ryzykavać biaśpiekaj ludziej dziela chvilinnych pryhožych žestaŭ.

Nielha kazać «usie darosłyja ludzi, usie ŭsio razumiejuć i biaruć na siabie adkaznaść». Nielha davać padstavu roznym «švalam z Hrodna», jak ich nazvaŭ deputat Marzaluk, kryčać na ŭvieś internet: «Pahladzicie, kaho pijarać ekstremisckija farmiravańni!» — i zaklikać da čarhovaha aryštu.

Naš Čałaviek hoda — ź inšaj Biełarusi. Z tych, u kaho ŭžo zabrali fizičnuju svabodu, užo zabrali navat hołas, ale nie mohuć zabrać hodnaść i ŭnutranuju svabodu. Navat za kratami hetyja ludzi svabadniejšyja i pryhažejšyja za nasielnikaŭ i paniavolnych naviednikaŭ załatoj kletki Pałaca Niezaležnaści.

Pavialičyć

Adzin ź mižnarodnych simvałaŭ represij u Biełarusi — hrodzienski žurnalist Andrej Pačobut. Čaćviorty hod jaho sprabujuć vypchnuć ź Biełarusi ŭ Polšču. «Ty kryminalny złačyniec, my prysudzili tabie 8 hadoŭ źniavoleńnia, ale jedź adsiul, my chočam pamianiać ciabie na adkryćcio pamiežnaha pierachodu ŭ Babroŭnikach». Kaniečnie, heta nie «miłasernaść», a palityčnaja kanjunktura. I Pačobut, dla jakoha heta ŭžo treci aryšt, razumieje heta nie horš za astatnich. 

U hetych palityčnych hulniach łukašysty zazyvali pryjechać u Biełaruś ministra zamiežnych spraŭ Polščy Radasłava Sikorskaha i navat prapanavali vydać Pačobuta ŭ abmien na Łatušku.

Adnak mienavita ŭ 2024 hodzie pytańnie Pačobuta ŭźniałasia da mižkantynientalnaha ŭzroŭniu — Polšča i Kitaj abmiarkoŭvali, jak vyzvalić žurnalista z Navapołackaj turmy-katavalni.

Moža, dla Polščy i Kitaja ŭmovy łukašystaŭ i prymalnyja — u ich svaja metazhodnaść. Ale vyhladaje, što hetyja ŭmovy nieprymalnyja dla samoha Andreja Pačobuta. Kali vyzvalajecie nievinavataha čałavieka — to prosta vyzvalajcie.

Były palitviazień raskazvaŭ, što da Pačobuta nie raz pryjazdžali i prasili napisać prašeńnie ab pamiłavańni. Navat hatovyja błanki padsoŭvali. Ale jamu niama ŭ čym kajacca.

Etničny palak, jaki choča mieć mahčymaść znachodzicca ŭ Biełarusi, dzie jon naradziŭsia i vyras — što moža być simvaličniej? Što moža być macniejšym simvałam sapraŭdnaha adzinstva našaj nacyi? Heta adzinstva, macniejšaje za łukašyzm. Usie my lubim Biełaruś i chočam, kab jana stała svabodnaj — niezaležna ad našaj nacyjanalnaści, pachodžańnia, koleru skury, palityčnych pohladaŭ i miesca žycharstva. 

I jany pryjduć, inšyja časy. Ništo nie byvaje biaskoncym. Hałoŭnaje — kab usie hetyja ludzi, zahartavanyja ciažkimi vyprabavańniami, znajšli svajo miesca ŭ adbudovie novaj Biełarusi.

• 21
• 1
• 1
• 2
• 0
• 0
• 0
• 15