«Isnuje prajekt pa stvareńni adzinaha katałoha franšyz Sajuznaj dziaržavy». Jak u Biełaruś zachodziać rasijskija sietki kram i kafe

Rasijanie vykuplajuć biznes u jeŭrapiejcaŭ i pryvodziać svoj

Kali ŭ pieradvajennym 2021 hodzie na dolu Rasii prypadała 42,6% zamiežnych inviestycyj, to pa vynikach troch kvartałaŭ 2024 hoda hety pakazčyk praktyčna dasiahnuŭ 70%, asnoŭnuju častku ź jakich składajuć pramyja zamiežnyja inviestycyi.

Biełaruski rynak dla Rasii ekśpiert BEROC Anastasija Łuzhina nazyvaje pryjarytetnym i zrazumiełym.

«Za apošnija niekalki hadoŭ my nazirajem, jak u Biełaruś masava prychodziać rasijskija sietki. Asabliva papularnaj zastajecca śfiera rytejłu. Na našym rynku źjavilisia takija sietki, jak DNS, LETOILE, «Podružka», juvielirnaja sietka ADAMAS».

Akramia hetaha, rasijanie vykuplajuć kampanii, jakija raniej naležali zamiežnikam.

«Paśla pačatku vajny z našaha rynku sychodzili ŭładalniki biznesu ź inšych krain. Niaredka pakupnikami stanavilisia mienavita rasijanie. Tak, naprykład, było z Unilever. Akramia taho, jany vykuplajuć i niekatoryja biełaruskija kampanii».

Taksama ŭ Biełaruś aktyŭna zachodziać IT-kampanii z rasijskim kapitałam. U tym liku takija bujnyja, jak VK i Tinkoff, a taksama Yadro i Astra Linux. 

Raspaŭsiudžvajucca rasijskija franšyzy na biełaruskim rynku.

«I hety trend budzie praciahvacca. Ciapier navat isnuje prajekt pa stvareńni adzinaha katałoha franšyz Sajuznaj dziaržavy. Užo viadoma, što ŭ Biełarusi chutka źjaviacca sietki hramadskaha charčavańnia «Šašłyk OFF» i «Chačapury Maryko».

Raniej u Biełarusi pa franšyzie zapracavała sietka «Jobidojobi». Čakajecca adkryćcio klinik łaziernaj epilacyi Laser Love.

Pavialičyć

Pry hetym dla rasijan Biełaruś — dastatkova maleńki rynak, tamu nie zaŭsiody jany razhladajuć jaho.

«Časta jany vykarystoŭvajuć naš rynak jak placoŭku dla vypracoŭki novaj stratehii raźvićcia, kali biznes maštabujecca i rychtujecca da vychadu na bolš bujnyja rynki, naprykład Kazachstana».

Biełaruski biznes taksama zachodzić u Rasiju

Anastasija Łuzhina adznačaje, što ŭ biełaruskaha biznesu taksama vyrasła cikavaść da prysutnaści na rasijskim rynku.

«Nie tolki rasijskija brendy praz franšyzu prychodziać u Biełaruś, ale i biełaruskija — u Rasiju. Naprykład, «Miłavica», «Konte», «Mark Farmel», «Biełviest»», — pryvodzić prykłady ekanamistka.

Łuzhina adznačaje, što rasijski biznes zacikaŭleny ŭ supracoŭnictvie ź biełaruskimi brendami adrazu pa dźviuch pryčynach:

«Pa-pieršaje, impart ź inšych krain, u tym liku z Kitaja, ciapier uskładnieny, a ź Biełaruśsiu takich prablem niama. Pa-druhoje, nadpis «Zroblena ŭ Biełarusi» dla rasijskaha spažyŭca roŭny znaku jakaści», — śćviardžaje ekanamistka.

Pavialičyć

Pry hetym rasijanam praściej zavajoŭvać pazicyi na biełaruskim rynku, čym biełarusam — na rasijskim. U pieršuju čarhu heta adbyvajecca za košt nizkaj kankurencyi ŭ Biełarusi.

«Biełaruski biznes u Rasii sutykajecca z bolš žorstkaj kankurencyjaj, tamu nie ŭsie mohuć tam zamacavacca. Akramia taho, rasijanam praściej adaptavacca, naprykład, da strohaha rehulavańnia cen, bo ŭ vypadku časovaj stratnaści ŭ našaj krainie ŭ ich jość mahčymaść utrymacca za košt svajho asnoŭnaha rynku», — adznačaje ekśpiertka.

Chto jašče inviestuje ŭ Biełaruś?

Kali havaryć pra inšyja krainy, to, akramia Rasii, u top-3 uvachodziać Kipr i AAE. Uličvajučy ŭ asnoŭnym afšorny charaktar hetych krain, možna kazać pra toje, što značnaja častka tych inviestycyj prypadaje na kampanii z rasijskimi abo biełaruskimi karaniami.

Što da ahulnych pakazčykaŭ, to jość vysokaja vierahodnaść, što ŭ 2024 hodzie abjom pramych zamiežnych inviestycyj, jakija pastupili ŭ realny siektar ekanomiki, budzie najhoršym za apošnija piać hadoŭ. Za studzień—vierasień 2024 hoda (śviežejšych danych niama) jon skłaŭ $3,96 miljarda.

U papiarednija hady za anałahičny pieryjad (try kvartały) ličby byli takija:

• 2020 — $4,5 miljarda
• 2021 — $4,8 miljarda
• 2022 — $4,64 miljarda
• 2023 — $4,55 miljarda

Heta pakazvaje na toje, što značny pryrost inviestycyj z boku Rasii nie pakryvaje straty, jakija raniej prypadali na inšyja krainy.

Akramia taho, u takoj tendencyi jość jašče adzin važny minus — pravodzić dyviersifikacyju Biełarusi budzie ŭsio składaniej, ličyć ekśpiertka.

Aproč inviestycyjnaha składnika, vyraznaje daminavańnie Rasii adbyvajecca i ŭ ahulnym handli Biełarusi. Ciapier na dolu Rasii prychodzicca amal 70% biełaruskaha handlu. Ministr zamiežnych spraŭ Biełarusi Maksim Ryžankoŭ taki pierakos u bok adnoj krainy nazvaŭ vynikam sankcyj i abmiežavańniaŭ z boku Zachadu. 

• 0
• 2
• 0
• 2
• 0
• 2
• 2
• 0