Dziela žab i rapuch u Anhlii na paŭtara miesiaca pierakryli darohu
Kab abaranić tysiačy rapuch, žab i trytonaŭ padčas ich masavaj mihracyi da miescaŭ razmnažeńnia, u horadzie Bat na paŭdniovym zachadzie Anhlii na šeść tydniaŭ pierakryli darohu, piša Bi-bi-si.
Čarłkomb-Lejn budzie zakryty dla transpartu da 23 sakavika. Za tym, kab darohaj nie karystalisia matacyklisty, buduć sačyć vałanciory.
Pierakryćcio daroh padčas mihracyi ziemnavodnych u Vialikabrytanii praktykujecca z 2003 hoda. Da hetaha času pad kołami mašyn hinuła da 62% ziemnavodnych, jakija ruchalisia da miescaŭ razmnažeńnia. U 2024 hodzie kolkaść zahinułych asobin źniziłasia da 6%.
Minułahodni siezon staŭ adnym z samych aktyŭnych za apošnija 14 hadoŭ. Učastak darohi Čarłkomb-Lejn daŭžynioj 0,8 km (pałova mili) tady pieraadoleli 3200 amfibij.
Chielen Chobs z Charlcombe Toad Rescue Group adznačyła, što dziakujučy achoŭnym zachadam miascovaja papulacyja ziemnavodnych zastajecca stabilnaj, niahledziačy na ahulnaje źmianšeńnie ich kolkaści pa ŭsioj krainie. Ale, pavodle jaje słoŭ, ciapier nastaŭ «pierałomny momant» z-za źmieny klimatu.
«Stanovicca ŭsio ciažej pradkazać pikavy čas mihracyi amfibij, tamu rašeńnie zakryć darohu na šeść tydniaŭ całkam apraŭdanaje», — skazała jana.
Vałanciory, apranutyja ŭ śpiecyjalnyja śviatłoadbivalnyja kurtki, u ahulnaj składanaści pravodziać kala 600 hadzin, patrulujučy darohu. Jany vykarystoŭvajuć lichtary i viodry, u jakija źbirajuć zhublenych amfibij.
Žab, rapuch i trytonaŭ biaruć u palčatkach, kab paźbiehnuć zaražeńnia, i pieranosiać da miesca razmnažeńnia kala voziera.
Ekołahi z arhanizacyi Froglife źbirajuć danyja ab papulacyjach rapuch.
Pavodle ich daśledavańniaŭ, za apošnija 30 hadoŭ kolkaść zvyčajnych rapuch skaraciłasia na 68%. Asnoŭnymi pahrozami dla hetych ziemnavodnych, na dumku ekołahaŭ, źjaŭlajucca transpart, źmiena klimatu i źniščeńnie naturalnaha asiarodździa ich pražyvańnia.
Ciapier čytajuć
Zahinuŭ biełaruski dobraachvotnik Alaksiej Łazaraŭ10
Kamientary