Byvaj, Brydžyt Džons! Jakim atrymaŭsia apošni film lehiendarnaj franšyzy

Śviet upieršyniu paznajomiŭsia z Brydžyt Džons jašče ŭ 1996-m. Tady brytanskaja piśmieńnica Chielen Fiłdynh vypuściła raman «Dziońnik Brydžyt Džons», pieršy ŭ sieryi knih pra abajalnuju brytanku. Joj trochi za 30, jana žyvie i pracuje ŭ Łondanie, a taksama sprabuje naładzić asabistaje žyćcio i pachudzieć.

U 2001-m historyju Brydžyt upieršyniu ekranizavali. Na hałoŭnuju rolu vybrali amierykanku Renie Ziełviehier, dvuch hierojaŭ druhoha płana syhrali Chju Hrant i Kolin Fiort — im dastalisia adpaviedna roli bosa Brydžyt Denieła Kliviera i jašče adnaho jaje zalotnika Marka Darsi.

Paźniej byli jašče dva ramany pra Brydžyt i dva filmy. Chutčej za ŭsio, što ciapier, u lutym 2025 hoda, historyja Brydžyt skančvajecca.

Novy film nazvali «Brydžyt Džons: U zachapleńni ad chłapčuka» (Bridget Jones: Mad About the Boy).

Ciapier Brydžyt užo za 50, i jana vychoŭvaje dvaich dziaciej. Mužčyna jaje žyćcia, Mark Darsi, zahinuŭ, i navat praz čatyry hady ŭdaŭstva Brydžyt nie daje sabie rady — naprykład, nie vychodzić na pracu i prychodzić u škołu, dzie vučacca jaje dzieci, u pižamie. Žančynu padtrymlivajuć siabry i toj samy Denieł Klivier, jaki pieratvaryŭsia ź jaje kachanka ŭ dobraha siabra i niańku dla dziaciej Džons.

Čas usio ž taki lečyć, i krok za krokam Brydžyt sprabuje adbudoŭvać žyćcio nanava. Jana viartajecca na pracu pradziusarki ŭ telešou, a taksama, nie biez dapamohi siabroŭ, asvojvaje tyndar — jak šmat źmianiłasia z časoŭ jaje maładości! I mienavita ŭ tyndary Brydžyt znachodzić niadaŭni znajomy, jakomu jana pradstaŭlajecca «žančynaj za 35». Voś tolki jamu 29, i jana sumniajecca — ci moža ŭ ich niešta atrymacca?

Pavialičyć

Raźvitańnie z Brydžyt Džons nie pavinna rasčaravać adeptaŭ franšyzy, bo kino šmat u čym atrymałasia padobnym da minułych jaje častak. Niahledziačy na jaŭnyja manipulacyi sa źniešnaściu, a to i na zachapleńnie płastyčnaj chirurhijaj, u Renie Ziełviehier atrymałasia ŭsio taja ž hareźlivaja i abajalnaja Brydžyt, jakuju śviet palubiŭ u nulavyja.

Heta pa-raniejšamu trochi niazhrabnaja hierainia, jakaja traplaje ŭ niazručnyja situacyi. Jak i raniej, Brydžyt zastajecca ścipłaj i prostaj, i šmat žančyn paznaje siabie ŭ jaje žyćci i jaje razvahach. A toje, što takaja zvyčajnaja i nieidealnaja žančyna znachodzić svajo kachańnie i viartajecca da žyćcia, peŭna ž natchnić tych hladačak, jakija čamuści stracili vieru ŭ takuju mahčymaść dla siabie.

Pavialičyć

Jość va ŭsim hetym tolki adzin minus: nie pakidaje adčuvańnie, što aŭtary siužeta pajšli pa biaśpiečnym šlachu. Havorka i pra stvaralnikaŭ filma, i pra Chielen Fiłdynh, bo ciapierašni film — ekranizacyja jaje adnajmiennaha ramana 2013 hoda. «Zabić» Marka Darsi, adnaho z hałoŭnych piersanažaŭ franšyzy — pa-svojmu śmiełaje rašeńnie, ale i jano nie dapamahaje zrabić hetuju historyju zaŭvažna navatarskaj. Dyj humar, pravierany ŭ minułych troch filmach, na čaćviorty raz miescami hučyć banalna. Chju Hrant u roli Denieła Kliviera i Ema Tompsan u roli praktyčnaj doktarki-hiniekołaha Brydžyt — badaj, samaje aryhinalnaje, što jość u hetym filmie. 

Ź inšaha boku, moža, aryhinalnaść tut nie hałoŭnaje? «Brydžyt Džons: U zachapleńni ad chłapčuka» — heta, chutčej, mahčymaść pražyć razam z dobra znajomaj hierainiaj novy dla jaje pieryjad, jaje smutak pa mužu i psichałahičnuju adaptacyju da ŭzrostu 50+. Stvaralniki filma robiać heta pryhoža i kranalna: tolki pasprabujcie nie puścić ślazu, kali pabačycie litaralna lubuju scenu z Kolinam Fiortam — vykanaŭca roli Marka Darsi źjavicca ŭ hetym filmie.

Jak skazaŭ Brydžyt jaje tata, niedastatkova prosta vyžyć, treba žyć. U svaim dziońniku, ź jakoha niekali ŭsio pačałosia, hetaja hierainia tak i piša: Brydžyt Džons, čas žyć! Hetaje ciopłaje i ŭtulnaje kino stanie dobrym napaminam pra nieabchodnaść žyć, navat kali vy nie brytanka za 50.

• 21
• 4
• 1
• 2
• 3
• 1
• 0
• 1