«Horš za Miunchien». Reakcyja jeŭrapiejskich palitykaŭ na zajavy Trampa ab pieramovach z Pucinym
Mnohija jeŭrapiejskija palityki ŭžo ŭviečary sierady adreahavali na zajavy prezidenta ZŠA Donalda Trampa ab jaho chutkaj sustrečy z Pucinym i razvahi Trampa i jaho ministra abarony Pita Chiehsieta ab tym, što viarnuć stračanyja Ukrainaj ziemli nierealna.
Adny zajavili, što biez Ukrainy i Jeŭropy mirnyja pieramovy niemahčymyja, inšyja — što takija słoŭnyja sastupki jašče da pačatku pieramovaŭ aznačajuć zdradu intaresaŭ i Ukrainy, i Zachadu, piša Bi-bi-si.
U toj samy čas, kali Tramp u Vašynhtonie raskazvaŭ pra svaju razmovu z Pucinym, kiraŭniki MZS viadučych krain Jeŭropy abmiarkoŭvali vajnu na sustrečy ŭ Paryžy. U vynikovaj zajavie jany zapeŭnili, što ich krainy hatovyja pavialičyć dapamohu Ukrainie i padtrymlivajuć jaje terytaryjalnuju cełasnaść.
«My hatovyja pavialičyć našu dapamohu Ukrainie. My zajaŭlajem ab padtrymcy jaje niezaležnaści, suvierenitetu i terytaryjalnaj cełasnaści pierad tvaram vajennaj ahresii Rasii. Naša ahulnaja meta — praciahvać padtrymlivać Ukrainu da dasiahnieńnia spraviadlivaha, ŭsioabdymnaha i tryvałaha miru», — havorycca ŭ zajavie ministraŭ zamiežnych spraŭ Francyi, Hiermanii, Polščy, Italii, Ispanii i Vialikabrytanii, a taksama kiraŭnikoŭ źniešniepalityčnaha i abaronnaha viedamstvaŭ Jeŭrasajuza.
Udzielniki narady padkreślili, što, ź ich punktu hledžańnia, Jeŭropa abaviazkova pavinna ŭdzielničać u mirnych pieramovach, i što jany majuć namier abmierkavać heta z amierykanskimi sajuźnikami.
«Niezaležnaść i terytaryjalnaja cełasnaść Ukrainy nie padlahajuć abmierkavańniu. Našym pryjarytetam ciapier pavinna być uzmacnieńnie Ukrainy i pradastaŭleńnie dziejsnych harantyj biaśpieki. Jeŭropa pavinna hulać centralnuju rolu ŭ lubych pieramovach», — tak reziumavała vyniki paryžskaj sustrečy kiraŭnik źniešniepalityčnaha viedamstva ES, były premjer-ministr Estonii Kaja Kałas.
Ministr zamiežnych spraŭ Hiermanii Analena Bierbak, kamientujučy zajavy Trampa, asobna padkreśliła, što sieparatnych pieramovaŭ, na jaje dumku, vieści nielha.
«Mir moža być dasiahnuty tolki sumiesnymi namahańniami. Heta značyć, z Ukrainaj i ź jeŭrapiejcami. Kab u Jeŭropu viarnuŭsia mir, my pavinny iści pa hetym šlachu razam», — skazała Bierbak vydańniu Politico. U hetym ža duchu vykazaŭsia i premjer-ministr Polščy Donald Tusk.
«My ŭsie chočam tolki miru. SPRAVIADLIVAHA MIRU. Ukraina, Jeŭropa i ZŠA pavinny pracavać nad hetym razam. Razam», — napisaŭ Tusk u Ch.
Były premjer-ministr Šviecyi, sustaršynia Jeŭrapiejskaj rady ŭ mižnarodnych stasunkach Karł Bilt paraŭnaŭ zajavy Trampa i Chiehsieta ź dziejańniami jeŭrapiejskich lidaraŭ na pieramovach z Hitleram u Miunchienie ŭ 1938 hodzie — pryčym paraŭnaŭ nie na karyść Trampa.
«Heta, viadoma, navatarski padychod da pieramovaŭ — pajści na vielmi vialikija sastupki jašče da ich pačatku. Navat Čembierlen ŭ 1938 hodzie nie apuskaŭsia tak nizka. I toj Miunchien skončyŭsia drenna», — napisaŭ Bilt u sietcy Ch».
Unutrypalityčny praciŭnik Trampa, sienatar-demakrat Adam Šyf abvinavaciŭ prezidenta i ministra abarony ŭ zdradzie intaresaŭ i Ukrainy, i ZŠA.
«Davajcie nazyvać rečy svaimi imionami: heta zdača intaresaŭ Ukrainy i našych intaresaŭ jašče da pačatku pieramovaŭ. Tramp, viadoma, vialiki śpiecyjalist pa zaklučeńni ździełak — ździełak na karyść Kramla», — zajaviŭ Šyf z dapamohaj tvitu.
Ministr zamiežnych spraŭ Łatvii Bajba Braže ŭ intervju Poitico padkreśliła, što ŭ lubych mirnych pieramovach abaviazkova pavinna ŭdzielničać Ukraina, i što dla pośpiechu pieramovaŭ treba vymatać Rasiju vajnoj.
«Kab atrymać pahadnieńnie ab miry, treba asłabić Rasiju na poli boju. Rasijskaja palityka, ekanomika, relihija, miedyja, pryvatny siektar — usio heta ciapier aryjentavana na vajnu. Tamu Rasiju treba prymusić da miru», — skazała Braže.
«Šlach da miru — heta źnižeńnie rasijskaj vajennaj siły. Inviestycyi ŭ moc Ukrainy — heta inviestycyi ŭ mir i pasłableńnie Rasii — heta inviestycyi ŭ mir. I važnym składnikam tut źjaŭlajucca sankcyi i ich paśpiachovaje prymianieńnie», — praciahnuła łatvijski ministr.
Adnapartyjec Trampa, kanhresmien respublikaniec Džo Uiłsan padtrymaŭ svajho prezidenta, ale pry hetym zajaviŭ, što ZŠA pavinny naroščvać i sankcyi suprać Rasii, i vajskovuju dapamohu Ukrainie.
«Prezident Tramp — daśviedčany pieramoŭščyk, jaki vałodaje mastactvam uhody, — napisaŭ Uiłsan, na čyj tvit źviarnuła ŭvahu ahienctva Interfaks-Ukraina. — My pavinny zabiaśpiečyć jamu maksimum ryčahoŭ, padrychtavaŭšy ŭsioabdymnyja sankcyi suprać Rasii i padaŭšy paŭnamoctvy dla chutkaha ŭzbrajeńnia Ukrainy».
Kamientary
Tramp načał ich otrabatyvať.