Raman Ratušny paloh u 2022-m pad Iziumam, a 27 lutaha zahinuŭ i Vasil Ratušny.
Va ŭkrainskaha žurnalista i byłoha apieratara telekanała «Biełsat» Tarasa Ratušnaha zahinuŭ užo druhi syn.
«27.02.2025 nočču na bajavym vyjeździe ad pramoha prylotu fpv (FPV-drona — NN) zahinuŭ piłot BPŁA «Ptachiv Madziara» Vasil Ratušny. Moj starejšy syn, majo žyćcio», — napisała na svajoj staroncy ŭ fejsbuku maci chłopcaŭ Śviatłana Pavalajeva.
Małodšy syn Ratušnaha i Pavalajevaj Raman zahinuŭ u pačatku vajny, 9 červienia 2022 hoda, u bai pad Iziumam u Charkaŭskaj vobłaści.
Taras Ratušny ŭ Instagram pryvioŭ słovy syna ź niadaŭniaj pierapiski:
«Kali ja hladžu ŭ budučyniu, to razumieju: adzinaje, što mianie pavinna chvalavać, — šmatrazovaje pavieličeńnie strat pid**am, kab chacia b na čas prypynić bai. Usio astatniaje, asabliva toje, što, naadvarot, viadzie da źnižeńnia strat [praciŭnika], prosta nie budzie mieć sensu».
Vasil Ratušny naradziŭsia ŭ 1996 hodzie, praz hod — Raman. Jak zhadvała raniej ich maci-piśmieńnica, padčas Aranžavaj revalucyi 2004 hoda jana zabirała synoŭ, jakim było 7—8 hadoŭ, sa škoły i išła razam ź imi na Majdan, jaki pratestavaŭ suprać falsifikacyi vybaraŭ.
Pa słovach Śviatłany Pavalajevaj, uvosień 2013 hoda ŭžo Raman vyciahnuŭ jaje na druhi Majdan — tady ad ułady adchilili prarasijski režym Viktara Janukoviča.
U 2018 hodzie małodšy syn piśmieńnicy ŭznačaliŭ ekałahičnuju inicyjatyvu «Abaronim Pratasaŭ Jar», a ŭ 2019 hodzie — adnajmiennuju hramadskuju arhanizacyju. Aktyvisty zdoleli adstajać zialonuju zonu ŭ centry Kijeva ad zabudovy.
Z pačatkam poŭnamaštabnaj vajny Raman staŭ dobraachvotnikam u šerahach Sił abarony Ukrainy. Spačatku braŭ udzieł u abaronie Kijeva, potym vajavaŭ u Charkaŭskaj vobłaści, byŭ raźviedčykam 93 Asobaj miechanizavanaj bryhady «Chałodny Jar». Zahinuŭ u vyniku artyleryjskaha abstrełu. U honar Ramana nazvali adnu z vulic Kijeva. Paśmiarotna Raman Ratušny byŭ uznaharodžany ordenam «Za mužnaść».
Starejšy syn piśmieńnicy Vasil Ratušny pajšoŭ na vajnu zimoju 2015 hoda, za dva miesiacy da svajho paŭnalećcia. Śviatłana zhadvała, što ab rašeńni svajho starejšaha syna jana daviedałasia ad małodšaha, jaki vydaŭ sakret brata. U vyniku jana sama sabrała jaho na vajnu.
Pa słovach piśmieńnicy, u 2019 hodzie, kali skončyŭsia kantrakt, Vasil nie staŭ jaho praciahvać, a zaniaŭsia budaŭnictvam svajho doma, ułasnaručna rabiŭ meblu. Dom tak i zastaŭsia niedabudavany. U 2022 hodzie Vasil znoŭ vymušany byŭ iści vajavać. Udzielničaŭ u bajach na Bachmuckim kirunku. U kastryčniku 2023 hodzie jon byŭ uznaharodžany hanarovym znakam Hałoŭnakamandujučaha US Ukrainy «Załaty kryž».
«Ja jašče [hetaha] nie pryniała. Jak ty mianie toŭk pa piačoncy, kali ja ciabie nasiła)) Moj daskanały rybańka. Chłopcy, tvaje pabracimy, vyžyli, viedaj toje — usio prylacieła ŭ ciabie», — napisała Śviatłana Pavalajeva.
Ciapier čytajuć
Vyjšaŭ na svabodu były top-žurnalist ANT Dźmitryj Siemčanka7
Kamientary