U siaredzinie lutaha našyja viartlavyja čarotaŭki vypravilisia z Afryki na Radzimu. Da rodnych bałot — 7000-8000 km, i jany dabiarucca tudy tolki ŭ kancy krasavika. Miž tym praviedzienaje śpiecyjalnaje daśledavańnie dazvoliła vyśvietlić, dzie mienavita ŭ Afrycy jany zimujuć, piša «Dzikaja pryroda pobač».
Arnitołahi ź Mižnarodnaj hrupy pa zachavańni viartlavaj čarotaŭki zrabili vizualizacyju na asnovie danych hieałakataraŭ, prymacavanych na ptuškach. Žoŭtyja kropki na karcie — viartlavyja čarotaŭki ź biełaruskaha zakaźnika «Servač», a čyrvonyja — ź litoŭskaha Klošaŭskaha zapaviednika.
Vyśvietliłasia, što našyja i litoŭskija čarotaŭki zimujuć u Mali. Papiaredniaje daśledavańnie zaśviedčyła, što ŭ hetaj samaj krainie zimujuć i čarotaŭki z paŭdniovaj Biełarusi i centralnaj Ukrainy.
Padčas daśledavańnia byli i niezvyčajnyja nazirańni. Adna ź litoŭskich ptušak u kancy lipienia pieralacieła na biełaruskaje bałota Servač, pieraadoleŭšy 400 km. Tam jana patusiła 10 dzion, a potym viarnułasia ŭ Litvu i adtul užo, jak i inšyja, vypraviłasia ŭ Afryku.
Jašče adna viartlavaja čarotaŭka ź Litvy abrała niezvyčajny maršrut. Jana ablacieła Atłaskija hory z uschodu, biez prypynkaŭ pierasiekła Sacharu i asieła ŭ Nihieryi, za 1000 km na ŭschod ad astatnich viartlavak z hieałakatarami. Tym ža maršrutam jana viarnułasia potym na miesca hniezdavańnia.
Viartlavaja čarotaŭka — vielmi redkaja ptuška, i joj pahražaje hłabalnaje źniknieńnie. Mienavita na biełaruskich asakovych bałotach hniazdujecca kala 40% hłabalnaj papulacyi hetaha vidu, ale kolkaść ich źnižajecca praz zarastańnie bałotaŭ tryśniahom i vierbałozam.
Ciapier čytajuć
Špakoŭski pra saŭładalnika «Varhiejminha» Kacałapava: Prafinansavaŭ pratesty na 296 tysiač dalaraŭ2
Kamientary