Paŭza ci kaniec? Što aznačaje rašeńnie ZŠA prypynić dapamohu Ukrainie

Donald Tramp prypyniŭ usiu vajskovuju dapamohu Ukrainie paśla sutyknieńnia z ukrainskim prezidentam Uładzimiram Zialenskim u Avalnym kabiniecie na minułym tydni. Tym samym prezident ZŠA akazvaje cisk na Kijeŭ, kab prymusić jaho padparadkavacca namahańniam ZŠA pa zaklučeńni mirnaha pahadnieńnia z Rasijaj, niahledziačy na adsutnaść harantyj biaśpieki dla Ukrainy, piša Rasijskaja słužba Radyjo Svaboda.

«My prypyniajem i pierahladajem našu dapamohu, kab pierakanacca, što jana spryjaje vyrašeńniu prablemy, — cytujuć ŚMI słovy čynoŭnika Biełaha doma, skazanyja na ŭmovach ananimnaści 3 sakavika. — Prezident jasna daŭ zrazumieć, što jon nakiravany na mir. Nam treba, kab našy partniory taksama byli addanyja hetaj mecie».

«Heta nie kančatkovaje spynieńnie dapamohi, heta paŭza», — cytuje Fox News pradstaŭnika administracyi Trampa. Pa danych Bloomberg i Fox News, paŭza praciahniecca datul, pakul Tramp nie vyrašyć, što lidary Ukrainy demanstrujuć sumlennaje imknieńnie da miru.

Ale hety pierapynak u dapamozie ŭzmacniaje i biez taho składanaje pytańnie ab padtrymcy Złučanymi Štatami Ukrainy ŭ jaje abaronie ad rasijskaha ŭvarvańnia ŭ toj čas, kali rasijskija vojski na praciahu mnohich miesiacaŭ atrymlivajuć vierch, choć i koštam vielizarnych strat, a Ukraina zmahajecca z prablemami z kadrami i inšymi ciažkaściami ŭ viadzieńni najbujniejšaj vajny ŭ Jeŭropie z 1945 hoda.

Lubyja pieraboi z pastaŭkami amierykanskaj zbroi na liniju frontu chutka asłabiać šancy Ukrainy adbić uvarvańnie Rasii. Prypynieńnie raspaŭsiudžvajecca na «ŭsiu vajskovuju techniku ZŠA, jakaja ciapier nie znachodzicca na terytoryi Ukrainy, uklučajučy zbroju, jakaja znachodzicca ŭ darozie na samalotach i karablach abo čakaje ŭ tranzitnych zonach u Polščy», — paviedamlaje Bloomberg.

Jaki abjom dapamohi zakranuć?

Dakładny abjom zakranutaj vajskovaj dapamohi nieviadomy, ale pieradača zbroi na sumu 3,85 miljarda dalaraŭ, sankcyjanavanaja Kanhresam pry raniejšym prezidencie Džo Bajdenie, jašče nie była raźmierkavanaja Biełym domam. Z momantu ŭstupleńnia Donalda Trampa na pasadu ŭ studzieni novaja vajskovaja dapamoha nie zaćviardžałasia.

Z pačatku poŭnamaštabnaha ŭvarvańnia Rasii ŭ lutym 2022 hoda Kanhres ZŠA vydzieliŭ bolš za 180 miljardaŭ dalaraŭ na padtrymku Ukrainy, pryčym blizu dźviuch tracin hetaj sumy — vajskovaja dapamoha.

«Pierš za ŭsio, prypynieńnie amierykanskaj dapamohi moža zakranuć zienitnyja rakiety, bojeprypasy HIMARS i artyleryju, — napisaŭ ukrainski deputat Alaksiej Hančarenka.

— Złučanyja Štaty źjaŭlajucca adzinymi vytvorcami sistem HIMARS i ATACMS, i kali jany skončacca, to zdolnaść Ukrainy nanosić udary daloka za linijaj rasijskich vojskaŭ i achoŭvać svaje tyłavyja pazicyi budzie pastaŭlenaja pad pahrozu».

«Jeŭropa moža pryniać miery, kab zadavolić ładnuju častku patrebaŭ Ukrainy ŭ artyleryjskich bojeprypasach u spałučeńni z bojeprypasami, užo pastaŭlenymi ZŠA ŭ pačatku hetaha hoda, — skazaŭ Majkł Kofman, staršy navukovy supracoŭnik Fondu Karniehi za mižnarodny mir, u intervju The Wall Street Journal. — Prablemy buduć stanavicca ŭsio bolš vidavočnymi pa miery nabližeńnia leta».

U vypadku poŭnaha spynieńnia vajskovaj dapamohi z boku ZŠA Ukraina ryzykuje stracić da 30 adsotkaŭ usioj zbroi, jakaja vykarystoŭvajecca siońnia ŭzbrojenymi siłami, zajaviŭ hałoŭny redaktar vajskova-analityčnaha sajta Defense Express Aleh Katkoŭ u intervju ŭkrainskamu vydańniu Suśpilnie.

Demakraty ŭ Kanhresie nieadkładna asudzili rašeńnie Trampa.

«Maje kalehi-respublikancy, jakija nazvali Pucina vajennym złačyncam i paabiacali praciahvać padtrymlivać Ukrainu, pavinny dałučycca da mianie i zapatrabavać ad prezidenta Trampa nieadkładna admianić heta katastrafičnaje i niezakonnaje zamarožvańnie», — zajaviŭ kanhresmien Hrehary Miks, demakrat sa štata Ńju-Jork.

Paŭza ŭ nadańni vajskovaj dapamohi nastupiła paśla niaŭdałaha vizitu Uładzimira Zialenskaha ŭ Bieły dom 28 lutaha. Ad vizitu čakali zaklučeńnia ździełki ab sumiesnaj raspracoŭcy ŭkrainskich redkich minierałaŭ i vuhlevadarodnych resursaŭ, jakuju Tramp nazvaŭ najvažniejšym krokam da miru pamiž Ukrainaj i Rasijaj. Zamiest hetaha sustreča pierad kamierami ŭ Avalnym kabiniecie pierarasła ŭ hučnuju svarku: Donald Tramp i vice-prezident Džej Dzi Vens zajavili, što Zialenski pavinien prajaŭlać bolš padziaki za padtrymku ZŠA i što jon nie ŭ tym stanoviščy, kab vystaŭlać patrabavańni.

• 0
• 0
• 0
• 1
• 2
• 1
• 9
• 0