Vialikija stryminhavyja servisy, jak Netflix, Amazon Prime Video i Peacock, aktyŭna pryciahvajuć papularnych YouTube-kreataraŭ dla stvareńnia novych šou.
Jak piša The Wall Street Journal, stvaralniki kantentu na YouTube pačynajuć zajmać svajo miesca ŭ Halivudzie. Vialikija stryminhavyja płatformy, takija jak Netflix, Amazon Prime Video i Peacock, imknucca supracoŭničać ź internet-zorkami, stvarajučy novyja šou i śpin-ofy.
Papularnyja kreatary pieratvaryli svoj kantent u šmatuzroŭnievyja biznes-impieryi, zarablajučy na rekłamie, sponsarskich kantraktach, žyvych vystupach i prodažy tavaraŭ. Heta robić ich asabliva kaštoŭnymi dla stryminhavych płatformaŭ, jakich pryciahvaje hłabalnaja aŭdytoryja, nizkija biudžety i vysokaja jakaść vytvorčaści.
Pavodle danych Nielsen, YouTube zajmaje 11% usiaho času prahladu na padklučanych televizarach, što značna bolš, čym 5,7% u 2021 hodzie.
Hałoŭnym šturškom da supracoŭnictva stryminhavych płatformaŭ z papularnymi stvaralnikami kantentu na YouTube staŭ pośpiech supracoŭnictva Amazon Prime Video z adnym z samych papularnych YouTube-kreataraŭ u śviecie (373 miljonaŭ padpisčykaŭ na YouTube) MrBeast (Jimmy Donaldson, Džymi Donaldsan).
Farmat Beast Games nahadvaje sumieś «Hulni ŭ kalmara» i kłasičnych realici-šou, dzie ŭdzielniki zmahajucca za vialikija hrašovyja pryzy. U pieršym siezonie ŭziali ŭdzieł 456 hulcoŭ, jakija zmahalisia za hałoŭny pryz $5 miljonaŭ — adzin z najbujniejšych u historyi padobnych prajektaŭ.
Šou stała chitom i pryniesła Amazon bolš za $100 miljonaŭ prybytku. Za pieršyja čatyry tydni paśla premjery amal kožny čaćviorty hladač Prime Video pahladzieŭ choć by adnu sieryju, a 60% hledačoŭ dahladzieli minimum try epizody.
Ciapier Amazon viadzie pieramovy adnosna 2-ha i 3-ha siezonaŭ, za kožny ź jakich błohier patrabuje bolš za $150 miljonaŭ.
Tym časam Netflix taksama aktyŭna pracuje z YouTube-zorkami. U studzieni płatforma vypuściła šou z Rejčeł Akursa (Rachel Accurso), viadomaj jak Ms. Rachel, papularnaj stvaralnicaj dziciačaha kantentu. Šou stabilna znachodzicca ŭ top-10 samych papularnych prajektaŭ Netflix u ZŠA.
Peacock, jaki naležyć Comcast, płanuje zapuścić čatyry kamiedyjnyja šou z aŭtarami YouTube, a Disney šukaje siamiejny kantent ad błohieraŭ.
U pošukach novych stvaralnikaŭ kantentu Amazon nabyŭ dolu ŭ Spotter — startapie, jaki dapamahaje błohieram finansavać ich prajekty. U studzieni kiraŭnik Amazon Studios Vernon Sanders (Viernan Sanders) vystupiŭ na samicie Spotter, zajaviŭšy, što stvaralniki kantentu pavinny prapanoŭvać nie toje, što, na ich dumku, chočuć stryminhi, a toje, što sapraŭdy cikava ich aŭdytoryi.
Amazon asabliva pryvabny dla YouTube-kreataraŭ, bo dazvalaje im prasoŭvać svaje tavary ŭ šou, što adpaviadaje jaho asnoŭnaj biznes-madeli e-commerce. Heta stvaraje ciažkaści ŭ pieramovach z Netflix, jaki zvyčajna nie dazvalaje rekłamu tavaraŭ u šou.
Niekatoryja jutubiery taksama aścierahajucca, što stryminhavyja płatformy buduć kantralavać ich kantent i źmianiać jaho na svaju karyść.
Jak by tam ni było, apošnija padziei pakazvajuć, što YouTube-zorki, jakich raniej Halivud ličyŭ druhasnymi, ciapier stanoviacca hałoŭnymi fihurami ŭ industryi zabaŭ.
Ciapier čytajuć
Navukoviec raspavioŭ pra hieałahičnyja zahadki Biełarusi: irtuć ź ziamli i kratar ad padzieńnia mietearyta, jaki źniščyŭ usio žyvoje ŭ radyusie tysiač kiłamietraŭ1
Kamientary