Pierasiakać miažu Biełarusi z Łatvijaj možna budzie tolki aŭtatranspartam
Ministerstva ŭnutranych spraŭ Łatvii atrymała prapanovu Dziaržaŭnaj pamiežnaj achovy ab častkovym zakryćci pamiežnych punktaŭ «Paternijeki» na miažy ź Biełaruśsiu (z našaha boku — «Hryharaŭščyna») i punktaŭ «Hrebnieva» i «Cierachova» na rasijskaj miažy.
Pavodle padrychtavanaha MUS prajekta rašeńnia, z 19 sakavika miažu ŭ zhadanych punktach možna budzie pierasiakać tolki na aŭtatransparcie. Abmiežavańni ŭvodziacca «z metaj uzmacnieńnia achovy miažy i pavyšeńnia efiektyŭnaści pamiežnaha kantrolu». Terminy dziejańnia abmiežavańniaŭ u prajekcie rašeńnia nie paznačany, piša Delfi.lv.
U anatacyi da prajekta padkreślivajecca, što častkovaje zakryćcio pamiežnych punktaŭ abumoŭlena hieapalityčnaj situacyjaj u suviazi z vajennymi dziejańniami Rasii va Ukrainie.
«Raźviazanaja Rasijaj vajna suprać Ukrainy, jakaja adkryta padtrymlivajecca Biełaruśsiu, rasceńvajecca jak faktar ryzyki i mahčymy matyŭ dla Rasii i Biełarusi praciahvać namahańni pa destabilizacyi situacyi na łatvijskaj miažy», — zajavili ŭ MUS.
Urad razhledzić padrychtavany MUS prajekt rašeńnia ŭ aŭtorak, 18 sakavika.
Jak raniej zajaviŭ načalnik DPA Huncis Pujats, u suviazi z napłyvam mihrantaŭ pamiežnaja achova źviarnułasia da ŭrada z prośbaj častkova zakryć pamiežnyja punkty, dazvoliŭšy pierasiakać miažu tolki aŭtatranspartam.
Načalnik DPA raskazaŭ, što ŭ vychodnyja dni pamiežny punkt «Paternijeki» byŭ zakryty na karotki čas z-za niestabilnaj pracy techničnych sistem i ryzyk, što jon moža być vykarystany nielehalnymi mihrantami, bo pamiežniki zaŭvažyli skapleńnie parušalnikaŭ na biełaruskim baku.
«Praanalizavaŭšy infarmacyju, my pryjšli da vysnovy, što isnuje vysokaja ryzyka taho, što punkt moža być vykarystany dla masavaha praniknieńnia nielehalnych mihrantaŭ u Łatviju», — skazaŭ Pujats, dadaŭšy, što pa toj bok miažy sabrałasia niekalki dziasiatkaŭ čałaviek, tamu byli pryniatyja previentyŭnyja miery, kab praduchilić ich sproby trapić u Łatviju.
Jak zajaviła paśla pasiadžeńnia kaalicyi premjer-ministr Evika Silinia, takija miery dazvolać abaranić Šenhienskuju zonu ad «patencyjnaj instrumientalizacyi mihracyi».
Adkazvajučy na pytańnie, ci budzie rašeńnie dazvolić pierasiakać miažu tolki na aŭtatransparcie dastatkovym dla zabieśpiačeńnia biaśpieki, Silinia skazała, što budzie abmiarkoŭvacca pytańnie, ci nie pačnuć mihranty vykarystoŭvać miechaničnyja transpartnyja srodki dla pierasiačeńnia miažy.
Kamientary