U pačatku vajny kavezešnicu Marynu Hrycuk vyvozili z-pad Kijeva na tanku. Ciapier jana viadzie mierapryjemstvy ŭ Rasii
Aktrysa i televiadučaja Maryna Hrycuk, jakuju ratavali z rasijskaj akupacyi ŭ pieršyja dni poŭnamaštabnaj vajny va Ukrainie, ciapier pracuje na biełaruskim telebačańni i viadzie roznyja mierapryjemstvy ŭ Rasii.
Bieraściejka Maryna Hrycuk vučyłasia ŭ Bresckim dziaržaŭnym techničnym univiersitecie. Budučy studentkaj, stała hulać u KVZ, spačatku za svaju VNU, paźniej trapiła ŭ zbornuju Biełaruskaha dziaržaŭnaha ŭniviersiteta. Kamanda BDU za jaje časami dvojčy stanaviłasia čempijonam vyšejšaj lihi KVZ. Z 2004 hoda Hrycuk pracavała na biełaruskim telebačańni, u 2019 hodzie dałučyłasia da akciorskaha składu ŭkrainskaha «Dyziel šou». U Maryny čaćviora synoŭ.
Kali Rasija napała na Ukrainu, Hrycuk trapiła ŭ akupacyju pad Kijevam — zachrasła ŭ Dymiery, što znachodzicca za 35 kiłamietrach ad ukrainskaj stalicy. Rasijskija vajskoŭcy ŭvajšli tudy na druhi dzień uvarvańnia. Kiraŭnik prajekta «Dyziel-šou» Jahor Krutahałoŭ tady raskazvaŭ, što Hrycuk «17 sutak prasiadzieła biez suviazi, bieź śviatła. A na 17-y dzień jaje muž, biełaruski śpiavak Akim Tyško damoviŭsia jaje zabrać. Pa jaje pryjechaŭ tank. Jana sieła ŭ jaho i takim čynam źjechała ŭ Biełaruś».
Kalehi Maryny zhadvali, što jaje praŭkrainskija simpatyi sumnievaŭ raniej nie vyklikali, ale publična i naŭprost adnaznačna vykazvacca pa temie jana nie rašałasia, nazyvajučy siabie «apalityčnaj». Hetak było i ź ihnaravańniem represij u Biełarusi. Znajomyja Hrycuk, da jakich «Naša Niva» źviarnułasia pa kamientar, dapuskajuć, što maŭčańnie praciahnułasia ŭ tym liku tamu, što jaje evakuacyju arhanizoŭvali ź biełaruskaha boku. A značyć tank, jaki jaje vyvoziŭ, chutčej za ŭsio, byŭ rasijski.
Paśla viartańnia Hrycuk na radzimu stała zrazumieła, što asnoŭnym rynkam jaje pracy budzie Biełaruś. Tamu lubyja vykazvańni ci pa temie rasijskaj ahresii, ci nakont represij stali tym bolš niedapuščalnyja.
Siońnia asabistyja staronki Hrycuk sucelna sterylnyja, pryśviečanyja pracy i pajezdkam za miažu. Niadaŭna Maryna naviedała z mužam Partuhaliju. Jana praciahvaje padtrymlivać vobraz čałavieka-soniejka, što zaŭsiody na pazityvie, z uśmieškaj na tvary.
Hałoŭnym čynam Hrycuk pracuje ŭ Biełarusi, a ŭ Rasiju vyjazdžaje ŭ kamandziroŭki. Ź niadaŭniaha — praca ŭ Sočy na Leaders Camp, a taksama na karparatyŭnym śviacie sietkavaj kampanii z rasijskimi karaniami Greenway Global. Mierapryjemstva jana viała razam z Harykam Marcirasianam.
Na «Jasnaje TB» (prajekcie «Biełtelekama») Hrycuk viadzie prahramu «Moj horad», u miežach jakoj katajecca pa Biełarusi i raskazvaje pra cikavostki roznych haradoŭ. Abaviazkovy spadarožnik vandrovak — adnajmienny mabilny dadatak ad «Biełtelekama» ź sistemaj navihacyi, jaki paralelna tut i rekłamujecca.
Taksama Hrycuk źjaŭlajecca tvaram kanała «TNT International» — mižnarodnaj viersii rasijskaha kanała TNT: jana viadzie ranišniaje šou «Padjom» i «Žanočaje šou», dzie ŭžo źjaŭlałasia raniej — u 2020 hodzie.
Akramia taho, Maryna dałučyłasia da kamandy nastaŭnikaŭ minskaj škoły televiadučych. Słovam, heta taksama prajekta TNT: navučańnie adbyvajecca niepasredna ŭ studyjach telekanała. Praktyka — taksama na ich prajektach. Razam ź joj niuansy pracy ŭ kadry vykładajuć, naprykład, Hieorhij Kałdun i Alaksandr Śmirnoŭ (eks-viadučy prahramy «Zona Ch»).
Telehledačy taksama mohuć pabačyć Marynu ŭ rekłamie — łatarei «Jeŭraopta», «Toje łato» ci mebli ad «Pinskdreŭ».
Ciapier čytajuć
Chrysta Hrozieŭ: Mielnikava jak minimum hod, a chutčej za ŭsio, paŭtara pieradavała infarmacyju biełaruskim śpiecsłužbam3
Kamientary