Dvoje pałonnych kitajskich hramadzian, Van Huancziuń i Čžan Renbo, na zładžanaj ź ich udziełam pres-kanfierencyi ŭ Kijevie zapeŭnivali, što nie čakali apynucca ŭ zonie bajavych dziejańniaŭ va Ukrainie, piša «Ukrainskaja praŭda».
Van Huancziuń z dapamohaj pierakładčyka raskazaŭ, što mieŭ pracu ŭ Kitai, ale «straciŭ jaje padčas pandemii karanavirusa i šukaŭ novy varyjant». Śpiarša jon nibyta damaŭlaŭsia z rasijskim rekrucioram pra pracu reabilitołaha dla paranienych vajskoŭcaŭ, a potym, jak sam zapeŭnivaje, «trapiŭ u vojska i ŭ jaho nie było vybaru».
Van prybyŭ u Maskvu 5 lutaha 2025 hoda, paśla čaho mieŭ piacidzionnaje navučańnie, a zatym u Rastovie-na-Donie čakaŭ svaju adpraŭku na front. Trapiŭ na liniju bajavoha sudakranańnia 1 krasavika, a 4-ha — u bajavyja dziejańni.
«U kitajskich sacsietkach, u pryvatnaści ŭ tyktoku, možna ŭbačyć roliki, na jakich jość ludzi ŭ formie. U Kitai prestyžna być vajskoŭcam, ale nie kožny moža być vajskoŭcam. Tamu ludzi sprabujuć uziać udzieł u bajavych dziejańniach u inšym miescy».
U svaju čarhu, Čžan Renbo raskazaŭ, što mieŭ u Kitai dastatkova zabiaśpiečanuju siamju i pracu pažarnikam-ratavalnikam. U Rasiju pajechaŭ nibyta padarožničać, a potym vyrašyŭ «zarabić trochi hrošaj».
Rasijanie spačatku, pa słovach Čžana, prapanoŭvali jamu pracu na budoŭli, a potym «pačałosia inšaje, i tut užo vy ničoha nie možacie zrabić».
20 śniežnia 2024 hoda Čžan pryjechaŭ u Maskvu, adtul u Rastoŭ-na-Donie, paśla ŭ akupavany Danieck, a paśla nibyta «kala miesiaca pieramiaščaŭsia ad blindaža da blindaža i kamunikavaŭ z vajskoŭcami pad pastajannymi abstrełami». 5 krasavika jon trapiŭ u pałon.
«U Kitai prapahandujecca siabroŭskaje staŭleńnie da Rasii. Mahčyma, mienavita takija rekłamnyja kampanii [u kitajskich sacsietkach] padachvočvajuć udzielničać u vajnie suprać Ukrainy […] Da taho, jak pryjechać va Ukrainu, lubaja infarmacyja [pra Ukrainu, jakuju ja atrymlivaŭ] była pra pieramohi Rasii — Rasija zachapiła toje, toje».
Pra ŭziaćcie ŭ pałon dvuch kitajskich hramadzian prezident Ukrainy Uładzimir Zialenski paviedamiŭ 8 krasavika. Praź niekalki dzion jon adznačyŭ, što takich vajskoŭcaŭ siarod rasijan kudy bolš, jak minimum 155.
Ciapier čytajuć
Što zdaryłasia z vykładčykam BNTU Michaiłam Ščukinym, jaki pamior pry zatrymańni. Viersija milicyi15
Kamientary
Vy surjozna?