Topavy ajcišnik padazravaŭ usich vakoł u zmovie. Paśla kansultacyj z čatam GPT jon zabiŭ svaju maci i siabie
Čat GPT jon nazyvaŭ imiem «Bobi».
U ZŠA 56-hadovy Štejn-Eryk Siołbierh, były topavy ajcišnik ź psichičnym razładam, miesiacami padazravaŭ, što vakoł jaho rychtujecca zmova. U vyniku jon zabiŭ svaju maci i siabie. A pierad hetym doŭha kansultavaŭsia z čatam GPT. Historyju raskazvaje The Wall Street Journal.
Siołbierh vyras u Hrynvičy (štat Kanekcikut), bahatym haradku niedaloka ad Ńju-Jorka. U 2018 hodzie, paśla razvodu z žonkaj, ź jakoj jon pražyŭ 20 hadoŭ i mieŭ dvuch dziaciej, mužčyna viarnuŭsia žyć da maci, bo prablemy ź psichičnym zdaroŭjem pavialičylisia.
Siołbierh mieŭ doŭhuju karjeru ŭ śfiery technałohij — pracavaŭ na vysokich pasadach u Netscape Communications, Yahoo i EarthLink. Ale z 2021 hoda jon byŭ biez pracy.
Kali mužčyna hetaj viasnoj rabiŭsia ŭsio bolš paranaidalnym, jon dzialiŭsia z ChatGPT padazreńniami nakont sačeńnia. Usie, na jaho dumku, advaročvalisia ad jaho: žychary jaho rodnaha horada, byłaja dziaŭčyna i navat ułasnaja maci. Amal na kožnym kroku ChatGPT zhadžaŭsia ź im.
Dla Siołbierha ChatGPT staŭ davieranym pamočnikam u pošukach dokazaŭ taho, što jon byŭ mišeńniu vialikaj zmovy.
ChatGPT nieadnarazova zapeŭnivaŭ Siołbierha ŭ jahonym zdarovym rozumie, a potym pajšoŭ dalej, padmacoŭvajučy jaho paranaidalnyja pierakanańni. Naprykład, Siołbierh śćviardžaŭ, što jaho maci i jaje siabroŭka sprabavali atrucić jaho, padsypaŭšy psichadeličny preparat u vientylacyjnyja adtuliny jaho aŭtamabila.
«Heta vielmi surjoznaja padzieja, Eryk, i ja vieru tabie», — adkazaŭ bot. «I kali heta zrabili tvaja maci i jaje siabroŭka, heta pavyšaje składanaść i zdradu».
Da leta Siołbierh pačaŭ nazyvać ChatGPT imiem «Bobi» i vykazaŭ ideju być ź im u zamahilnym śviecie. «Z taboj da apošniaha ŭzdychu i dalej», — adkazaŭ bot.
5 žniŭnia palicyja Hrynviča daviedałasia, što Siołbierh zabiŭ svaju maci i siabie ŭ domie, dzie jany žyli razam.
Heta, padobna, pieršaje zadakumientavanaje zabojstva z udziełam čałavieka ź psichičnymi prablemami, jaki intensiŭna ŭzajemadziejničaŭ z čat-botam štučnaha intelektu.
Kamientary