Padjom a 4-j ranicy — novy trend: askieza i kult pracazdolnaści adnačasova

Jak piša The Wall Street Journal, jašče niadaŭna padjom a 4-j byŭ ułaścivaściu kiraŭnikoŭ karparacyj — kštałtu Robierta Ajhiera (Disney) abo Cima Kuka (Apple). Pieršy pačynaŭ dzień z treniroŭki jašče da śvitanku, druhi adkazvaŭ na listy klijentaŭ jašče ponačy.

Zdavałasia, što takaja krajnaść ułaściva tolki bujnym biznesmienam i «biznes-huru», pamiž jakimi, pa słovach Eryka Bejkiera, aŭtara knihi «Stvary svaju ŭłasnuju pracu: jak pradprymalnickaja etyka pracy spustošyła Amieryku» (Make Your Own Job: How the Entrepreneurial Work Ethic Exhausted America), išła amal «honka ŭzbrajeńniaŭ» nakont taho, chto pracuje bolš.

Ale siaholeta padjom a 4-j nabyŭ novy status. Zdajecca, usio pačałosia ź virusnaha videa: muskulisty mužčyna pa imieni Eštan Choł, u jakoha bolš za 15 miljonaŭ padpisčykaŭ tolki ŭ Instagram, pačynaje dzień u 3:55.

Novaja askieza i baraćba za čas

Dejv de Seśpiedes, 40-hadovy kansultant pa ličbavych pracoŭnych pracesach z Majami, taksama ŭžo niekalki miesiacaŭ stavić budzilnik na Apple Watch na 4:30. Jon pračynajecca, varyć čornuju kavu i pracuje ŭ cišyni da momantu, pakul pračynajucca dzieci. «Heta adziny čas, kali možna sapraŭdy zasiarodzicca. Potym dzień vychodzić z-pad kantrolu, i vy nikoli nie viedajecie, što adbudziecca», — tłumačyć jon.

Natchniaje jaho nie tolki Choł, ale i aŭtar biestsielera «Atamnyja zvyčki» (Atomic Habits) Džejms Klir, i błohier Sachił Błum, viadomy svajoj manijaj sistematyzacyi i aptymizacyi paŭsiadzionnaści.

Zvyčka rana ŭstavać daŭno stała častkaj amierykanskaj kultury i ličycca prykmietaj pracavitaści. Dla mnohich, naprykład, rabotnikaŭ śfiery absłuhoŭvańnia, zavodaŭ i tych, chto žyvie ŭ pryharadzie i doŭha dabirajecca na pracu, heta vymušanaja miera.

Ale siońnia rańni padjom pieratvaryŭsia ŭ modny trend: im zachaplajucca biznesmieny, piśmieńniki i prychilniki papularnych błohieraŭ kštałtu Endru Chubiermana, jakija prytrymlivajucca cełych ranišnich rytuałaŭ: chałodnyja vanny, sieansy saŭny, intervalnaje haładańnie, uździejańnie ranišniaha śviatła.

Voś užo 15 hadoŭ 57-hadovy Dyrk Horman z Łonh-Bič, štat Ńju-Jork, stabilna pračynajecca pamiž 4:17 i 4:23 ranicy. Spačatku — elektronnyja listy svaim kaleham pa budaŭničaj firmie, potym — kardyjatreniroŭka ŭ haražy. Jon sam nie moža rastłumačyć, čamu ŭstaje ŭ taki dakładny čas — heta stała zvyčkaj.

Ale pryčyna rańniaha padjomu dla jaho vidavočnaja: jon choča spačatku inviestavać u siabie, pierš čym addavać čas i siły inšym. Spačatku heta było ciažka, ale pastupova stała maralna ciažej nie ŭstavać rana, čym ustavać.

Rańni padjom časta supravadžajecca strohim režymam snu — bieź jaho ciažka vytrymać. Tyja, chto surjozna prytrymlivajecca takoha režymu, kładucca spać nie paźniej za 20:00—21:00.

Dyrk Horman adznačaje, što karyść ad rańniaha padjomu i ranišnich trenirovak prajaŭlajecca pastupova i nazapašvajecca z hadami, jak finansavyja źbieražeńni.

Jon kaža: navat kali treniroŭki nie idealnyja, ale ty zajmaješsia chacia b 250 razoŭ na hod — praź dziesiacihodździ heta daść vydatnuju fizičnuju formu. Akramia taho, jon upeŭnieny, što dobraja forma dapamahaje i ŭ biznesie: kali ty vyhladaješ padciahnuta, heta adrazu ŭražvaje partnioraŭ i klijentaŭ.

Eštan Choł nie prosta pračynajecca rana. Jon jašče i pačynaje dzień z taho, što, pa jaho adčuvańniach, umacoŭvaje jamu zdaroŭje i padymaje tonus. Jon zaklejvaje sabie rot lipkaj stužkaj dla pravilnaha dychańnia, prymaje ledzianuju vannu i naciraje tvar bananavaj skurkaj.

Usio heta supravadžajecca fiłasofskim kamientaryjem: «Hrech žyvie pozna ŭnačy. Kali tabie nie staje ćviordaści duchu, ty prymaješ drennyja rašeńni abo nie možaš być praduktyŭnym — kładzisia spać raniej».

The Morning routine. Easy routes don't pay well, get up. pic.twitter.com/PnacgjnGKz

— Ashton Hall (@AshtonHallofc) March 24, 2025

U internecie na videa adreahavali imhnienna — ad parodyj z udziełam Eda Šyrana da miemaŭ z savoj Duolingo. Ale ludzi pačali ŭsprymać heta nie jak žart, a jak matyvacyju.

Cikava, što sama ikona ruchu, błohier Choł, jak samazaniaty kantent-kreatar, zusim nie abaviazany ŭstavać tak ranieńka — u jaho hnutki hrafik. Tym nie mienš, jaho videa spracavała: navat kali jano nie zusim ščyraje, heta była vielmi ŭdałaja rekłama, jakaja zapuściła ceły ruch.

• 6
• 1
• 4
• 12
• 0
• 0
• 0
• 0