«Heta nie płan miru, a teatr». Zialenski adchiliŭ prapanovu Rasii pra trochdzionnaje pieramirje
Prezident Ukrainy Uładzimir Zialenski raskrytykavaŭ inicyjatyvu Kramla ab «humanitarnym pieramirji» z 7 pa 9 maja, nazvaŭšy jaje teatralizavanaj pastanovaj, nieprydatnaj dla realnaha spynieńnia vajny. Ukrainski lidar nastojvaje na paŭnavartasnym pieramirji prynamsi na 30 dzion.
Padčas razmovy z žurnalistami Zialenski zajaviŭ, što «hulnia Pucina ŭ humanitarnuju misiju» źviazanaja vyklučna z dataj — 7 maja 25 hadoŭ tamu jon staŭ prezidentam Rasii, i ciapier sprabuje skarystać pieramirje dla svajho imidžu i vychadu ź izalacyi pierad śviatkavańniami 9 maja.
Tamu, jak padkreśliŭ Zialenski, prapanovy Rasii — heta chutčej teatralnaja pastanoŭka, bo niemahčyma za dva-try dni pabudavać jaki-niebudź płan nastupnych krokaŭ pa spynieńni vajny.
«Hulać na toje, kab stvaryć Pucinu miakkuju atmaśfieru dla vychadu ź izalacyi 9 maja, i kab usim było kamfortna i biaśpiečna — tym lidaram, ci siabram Pucina, ci partnioram, jakija pryjduć na Kramloŭskuju płošču pa toj ci inšaj pryčynie 9 maja, — nichto Pucinu dapamahać nie budzie. My prosta albo vajujem, albo Pucin pakazvaje, što hatovy da spynieńnia ahniu, da pieršaj častki zakančeńnia vajny. My hatovyja pačać z 1, z 3, z 5. Kali jamu patrebna data 7, nam usio roŭna. Ad 7 — 30 dzion», — skazaŭ Zialenski.
Zialenski padkreśliŭ, što za try dni niemahčyma ŭzhadnić nijakich realnych krokaŭ da zakančeńnia vajny, tamu takaja inicyjatyva vyhladaje niesurjozna.
Jon adznačyŭ, što ZŠA prapanavali madel biezumoŭnaha spynieńnia ahniu, i Ukraina jaje padtrymlivaje. Pavodle jaho słoŭ, pieramirje maje doŭžycca nie mienš za miesiac.
«Kali Rasija sapraŭdy hatovaja da miru, niachaj padtrymlivaje 30-dzionnuju inicyjatyvu. Usio astatniaje — prosta sproba zrabić kamfortnyja ŭmovy dla Pucina i jaho haściej na 9 maja», — skazaŭ prezident.
Zialenski taksama padkreśliŭ, što bieź jakasnaha mižnarodnaha manitorynhu dasiahnuć «poŭnaj cišyni» na froncie niemahčyma. Jon nahadaŭ, što i paśla 2014 hoda stralba nie spyniałasia całkam navat padčas pieramirjaŭ.
Taksama Zialenski zajaviŭ, što Ukraina nie moža harantavać biaśpieku suśvietnych lidaraŭ, jakija pryjeduć u Maskvu na parad 9 maja. «My nie možam nieści adkaznaść za toje, što adbyvajecca na terytoryi Rasii», — skazaŭ jon.
Ciapier čytajuć
Knyrovič raskazaŭ, čamu były dyrektar aršanskich zavodaŭ paśla vyzvaleńnia pajšoŭ vajavać za Rasiju, dzie i zahinuŭ1
Kamientary